Padayon ang pag-ulbo sa mga rali ug demonstrasyon sa mga demokratikong hut-ong ug sektor sa lain-laing bahin sa nasud sa milabayng duha ka semana aron nga kundenahon ang malukpanong korapsyon sa rehimeng Marcos. Kapasikaran nila ang rali sa gatusan ka libong Pilipino sa Luneta Park sa Maynila ug misunod nga martsa sa Mendiola.

Sa dakung protesta niadtong Setyembre 21, miulbo ang komprontasyon sa Mendiola ug kadalanan sa Recto. Nabidyuhan ang brutal nga pag-atake sa mga pulis sa mga kabatan-onan, paghampak kanila og batuta, pagsipa ug bangis nga pagguyod. Nataho usab ang pagpamusil sa mga pulis ug paglabay og tirgas.

Wala nahulga ang mga kabatan-onan ug katawhan sa gipakitang kamangtas ug brutalidad sa armadong pwersa sa rehimeng Marcos dihang bangis niining gibungkag ang protesta ug komprontasyon. Dili moubos sa 277 ka indibidwal, lakip ang 91 ka menor de edad (9-anyos ang pinakabata), ang gidagit sa mga pulis.

Namatay ang mamumuo sa konstruksyon nga si Eric Saber human maigo og bala sa liog sa nagpabuto nga pulis. Gikan si Saber sa iyang trabaho sa Pasay City, minaog sa Recto Station ug motabukay aron mosakay og dyip dihang naigo siya gikan sa likod. Nadala siya sa ospital apan namatay ra niadtong Setyembre 23. Namatay usab atol sa komprontasyon ang 15-anyos nga si Mark Chustin Serbo, uban sa mga nagprotesta, nga gidunggab sa 52-anyos nga sibilyan.

Nakasinati og kabangis sa kamot sa mga pulis ang mga giaresto ug gipriso. Lakip kanila mga bata ug batan-on, estudyante, mamumuo, mga empleyado sa BPO, ug pipila ka giinitan sa pulis tungod lang anaa sila sa lugar sa pagsinukgamay. Nagsugod lamang nga buhian ang mga giaresto niadtong Setyembre 25 human ang gilangan ug gitanggong pagproseso sa mga pulis ug huwes sa ilang kaso. Daghan ang kinahanglang magpyansa aron makagawas gikan sa patung-patong nga mga kaso.

Gibuhian usab ang mga menor-de-edad nga gidagit ug giaresto nga giilang lambigit sa kagubot bisan walay tin-aw nga imbestigasyon. Ang pipila kanila giatubang pa ni Manila City Mayor Isko Moreno Domagoso sa publiko ug midya, lapas sa katungod sa mga bata ug hustong proseso sa balaod.

Nanawagan ang mga grupo sa tawhanong katungod sa tibuok ug independyenteng imbestigasyon aron panubagon ang tanang nalambigit sa kabangis. Gikundena usab nila ang “cover-up” sa mga krimen sa estado batok sa katawhan.

Nagprotesta ang katawhan

Padayon nga nahulma ang kalihukang kontra korapsyon pinaagi sa mga walkout, mga piket-protesta nga ginatawag og Black Friday Protest, ug nilungsod nga protesta sa mga sektor ug grupo. Liboan ang subling nagprotesta sa Metro Manila, Isabela, Bulacan, Pampanga, Laguna, Palawan, Naga City, Davao City, Davao Oriental, ug uban pang mga syudad ug prubinsya.

Human sa serye sa walkout niadtong unang tulo ka semana sa Setyembre, subling nataho ang makasaysayanong mga walkout sa Far Eastern University (1,000), University of Sto. Tomas (1,500), De La Salle University-Manila ug College of St. Benilde (1,500), Philippine Normal University (1,000), Isabela State University (500), DLSU-Laguna, UP Visayas (800), Ateneo de Davao University (1,000), Brokenshire College Inc. ug Davao Oriental State University. Singgit sa kabatan-onan bisan sa mga konsyerto ug mga dula: “Ikulong na yan, mga kurakot!”

Nag-walkout usab ang gatusan ka mga magtutudlo ug mamumuo sa edukasyon niadtong Oktubre 3 isip pagmakmak sa korapsyon ug pagdumdum sa World Teachers’ Day.

Sa Bulacan, na ginailang sentro sa kahiwian sa mga proyektong flood control, nahulma ang lagpad nga panaghiusa sa katawhan batok sa korapsyon. Milihok ang mga Bulakenyo sa 12 ka syudad ug lungsod sa prubinsya ug nagkakusog nga pagbatok sa mga lokal ug nasudnong ahensya sa gubyerno nga nalambigit sa korapsyon. Nagtukod sila og mga grupo ug alyansa.

Ginasalamin sa nagkakusog nga mga protesta ang lalum nga diskuntento sa mga Pilipino atubangan sa krisis sa ekonomiya ug pulitika nga mihampak sa nagharing sistema. Manipestasyon kini sa malukpanong sentimyento sa lapad nga masa nga nag-antus sa korapsyon ug nagkagrabeng mga problema sa semikolonyal ug semipyudal nga sistema.