Walay hunong ang pagsabwag og kabangis sa rehimeng Marcos ug armadong pwersa niini batok sa katawhan sa milabayng mga semana. Nataho ang duha ka kaso sa pagpatay, pagpamusil ug pagpamig-ot sa mga lider-masa sa Visayas.

Niadtong Oktubre 5 sa gabii, gipatay sa giusang pwersang militar ug pulis si Roberto Cabales ug mag-uumang si Matteo Suarez sa Barangay Coto, Lambunao, Iloilo. Gipagawas sa pulis ug militar nga nanlaban o misukol ang duha samtang ginatunulan og mandaymento de aresto. Gipanghimakak sa rebolusyonaryong kalihukan sa Panay ang maong pasangil ug giingong dili armado ang duha.

Sa Samar, gipatay sa 43rd IB ug sa paramilitar nga Dos ang mag-uumang si Veronico “Tatay Birong” Anterio, 65, niadtong Setyembre 16 sa Barangay Carolina, Matuguinao. Gipuntirya siya tungod nagsilbi siyang tingog sa pagsukol sa pagharing militar sa 43rd IB ug sa grupong paramilitar nga Dos sa ilang komunidad. Maisugong miatubang si Anterio sa mga pasista aron batukan ang mapig-utong lakang nga gipahamtang sa Barangay Carolina nga gikampuhan sa 43rd IB.

Pagpamusil. Paturagas nga namusil ang mga gwardya ug pribadong armadong pwersa batok sa mga mamumuong-panguma sa Hacienda Escolastica, Barangay Mabini, Cadiz City, Negros Occidental niadtong Setyembre 30. Pito ka mag-uuma ang naangol sa insidente. Giguba ug gikawat usab sa mga gwardya ang mga tanum nga mais sa mga mag-uuma. Ginahasi sila tungod sa ilang pakigbisog alang sa katungod sa yuta sa asyenda.

Pagpamig-ot. Gipasakahan sa mga pulis og reklamong paglapas sa Batas Pambansa 880 o ang Public Assembly Act ang mga lider-masa sa Cebu nga mao silang Nanay Bebe Allere sa Panaghupong-Kadamay, Jaime Paglinawan sa Bagong Alyansang Makabayan-Central Visayas, John Ruiz sa Bayan Muna, Howell Villacrucis sa AMA-SUGBO-KMU, ug uban pa niadtong Setyembre 29. Ang reklamo nagsumikad sa protesta kontra korapsyon sa Cebu City District Engineering Office sa Department of Public Works and Highways Region VII niadtong Setyembre 5.

Samtang, nakasinati usab og pagpamig-ot ug Red-tagging gikan sa 503rd IBde si Beatrice “Betty” Belen niadtong Setyembre 28-29 dihang giadtuan siya sa Barangay Uma Del Norte, Lubuagan, Kalinga. Nagbarog siya isip kasamtangang lider sa Innabuyog-Kalinga ug kanhing bilanggong pulitikal.