Nagtapok niadtong Setyembre 30 sa San Pablo Apostol Parish Church sa Maynila ang gatusan ka residente sa Smokey Mountain ug uban pang barangay sa Tondo, ug mga lider-relihiyoso ug grupong maki-kinaiyahan aron tukuron ang Manila Anti-Incinerator Alliance (MAIA). Ang panagtapok, nga giatol sa Day of Action Against Incineration, nagtinguhang batukan ang planong pagtuod sa ₱26-bilyong waste-to-energy (WTE) incinerator sa Barangay 128, Smokey Mountain.

Ang proyekto usa ka 100 megawatt nga WTE Incineration Plant nga ginaduso sa Manila Integrated Environment Corp. (MIEC), kumpanyang kontrolado sa Philippine Ecology Systems Corp. (PHILECO) nga gipanag-iya sa negosyanteng si Reghis Romero II. Suportado kini sa kumpanyang Japanese nga Kanadevia Corporation ug nakagambalay ang pagtukod sa malukpanong Port Modernization nga nagsubay sa pantalan sa Maynila.

Lakip ang planta sa ginailang mga prayoridad nga proyekto sa rehimeng Marcos ug lokal nga gubyerno sa Maynila sa pagpanguna ni Isko Moreno. Matud sa mga eksperto, peligroso sa panglawas ang ibugang aso sa incinerator. Dugang dinhi, kapin 2,000 pamilya o 23,000 residente ug manindahay ang mapalayas sa lugar sa konstruksyon niini.