Sa ikatulong higayon, giatras sa Commission on Elections (Comelec) ang eleksyong parlamentaryo sa Bangsamoro Autonomous Region in Muslim Mindanao (BARMM) nga nakatakda untang ilunsad sa Oktubre 13. Kini human gideklara sa Korte Suprema nga lapas sa konstitusyon ang Bangsamoro Autonomous Act 77 (BAA 77 o Redistricting Bill), nga nagtakdang ibalhin ang pito ka pwesto sa parlamento nga orihinal nga nakagahin alang sa Sulu sa laing distrito sa BARMM.

Gimando sa korte ang Bangsamoro Transition Authority (BTA) nga maghimo og bag-ong bahinay sa mga distrito ug isumite kini sa korte sa Oktubre 30. Gibalhin usab niini ang paglunsad sa eleksyon sa katapusan na sa Marso 2026. Nagpasabot kini sa pagkausik sa ₱1.2 bilyong pondo nga nagamit na sa Comelec sa pag-andam sa eleksyon.

Gilantaw sa katawhang Moro ang subling pag-atras isip lain na usab nga kapakyasan aron ipatuman ang tinuod nga awtonomiya sa ilang mga teritoryo. Ayha pa gipagula ang desisyon, gibabagan na nila ang pagpahunong sa Comelec sa pag-andam tungod sa temporary restraining order sa Korte Suprema batok sa BAA 77. Matud nila, dili lamang mahitungod sa pagboto ang eleksyon. Mas importante, kini mao ang pagrespeto sa awtonomiya, pagtahud sa mga kasabutan sa kalinaw ug pagpalig-on sa katungod alang sa kaugalingong paghukum sa katawhang Moro.