Sa Oktubre 7, pagadumdumon sa kalibutan ang ikaduhang anibersaryo sa makasaysayanong Al Aqsa Flood, ang armadong opensiba gikan sa kayutaan, kadagatan ug kahanginan sa mga pwersang Palestino, nga gipangulohan sa Hamas ug sa Izz ad-Din al-Qassam Brigades, batok sa mananakop nga Israel.

Gipaulbo sa opensiba ang tinguha sa katawhang Palestino aron tapuson ang 75-ka-tuig nga gubat agresyon sa Israel. Suportado sa US ang okupasyon sa mga teritoryong Palestino, lakip ang nagpadayon nga pagpulbos sa Gaza, ug mga pag-atake sa mga komunidad sa West Bank.

Sa misunod nga duha ka tuig, walay hunong nga gimomba sa Zionistang Israel, sa tabang sa imperyalismong US ug mga alyadong nasud sa Europa, ang sibilyang populasyon sa Gaza. Gipulbos niini ang mga ospital, simbahan, eskwelahan, apartment, bilding ug bisan ang mga evacuation center.

Mikabat sa kapin 66,500 ka Palestino ang gipatay, 18,500 niini mga bata. Napatay usab ang 453 tungod sa malnutrisyon ug gutom. Anaa sa 254 ka mga midya usab ang gipatay. Niadtong Marso, hingpit nang gipugngan sa Israel ang pagsulod sa ayuda sa syudad, samtang gigamit sa sundalong Israeli ug mga mersernaryong Amerikano ang pag-apud-apud niini aron patyon ang mga Palestino. Niadtong Setyembre, bisan og ulahi na kaayo, gideklara sa United Nations Commission of Inquiry ang ginahimo sa Israeli sa Gaza isip henosidyo.

Ilingkawas ang Palestine!

Saksi ang katawhan sa tibuok kalibutan sa kahusto sa armadong pakigbisog sa mga Palestino aron molingkawas gikan sa okupasyon ug henosidyo sa Zionistang Israel. Naghiusa ang mga katawhan aron ipakita ang ilang kasuko sa henosidyo, samtang ginaduso ang tagsa-tagsa nilang gubyerno nga mobarog alang sa mga Palestino. Liboan ka protesta nga adunay nagkadaiyang porma sa lain-laing bahin sa kalibutan nga gisalmutan sa minilyong katawhan ang makanunayong gilunsad. Nagduyog ang mga nasud gikan sa Africa, Asia ug Latin America aron maglunsad og kampanyang ligal batok sa okupasyon, aron panubagon kini sa mga krimen sa gubat.

Niadtong Nobyembre 2024 nagpagula ang International Criminal Court og mandamyento de aresto batok kang Prime Minister Benjamin Netanyahu sa Israel ug kang Yoav Gallant, kanhing ministro sa depensa alang sa kasong krimen sa gubat ug krimen batok sa katawhan. Sa umalabot nga Nobyembre, pagalunsaron ang International People’s Tribunal alang sa Palestine sa International League of Peoples’ Struggle ug International Association of Democratic Lawyers aron idokumento ug hukman ang mga krimen sa gubat, henosidyo, ecocide ug malukpanong pagpagutom sa Israel ug sa US sa mga Palestino.

Niadtong Agosto, naglawig ang gitawag og Global Sumud Flotilla, nga gilangkuban sa 44 ka barko nga adunay sakay nga kapin 400 ka katawo, aron maghatud og serbisyo ug ayuda sa Gaza. Bisan og naharang sa Israel Defense Forces (IDF) ang mga barko niadtong Oktubre 2, mibarog ang mga milamot dinhi dili sila mohunong sa pagsupak sa pag-atake sa Israel sa Gaza.

Bisan ang mga katawhan sa Israel mibatok ug misupak sa mga lakang sa ilang gubyerno. Daghang batan-ong Israeli ang gipiling magpapriso kaysa magpasakop sa IDF.

Sa Pilipinas, padayon nga nagalihok ang mga organisasyon aron maghatag og suporta ug pakighiusa sa pakigbisog sa mga Palestino, sama sa Youth for Palestine ug Palestine-Philippines Friendship Association. Naglunsad usab og kampanya aron pugngan ang rehimeng US-Marcos sa pagpalit og armas sa Israel. Bisan sa ubang nasud, nahimong kabahin ang mga Pilipinong migrante sa mga protesta alang sa pagpalingkawas sa Palestine.

Sa kasamtangan, anaa sa proseso sa negosasyon ang Hamas, ang Israel ug US, subay sa gitibuok nga programa alang sa panaghisgot kalinaw para sa Gaza ni Donald Trump, presidente sa US, nga pagpakabana sa mismong katawhan niini.

Taliwala sa grabeng atake nga nahiaguman sa mga Palestino, padayon pa gihapon ang ilang pagsukol pinaagi sa armado ug dili armadong pakigbisog. Matud kang Leila Khaled, myembro sa Popular Front for the Liberation of Palestine, sigurado nga moabot ra ang kalingkawasan sa mga Palestino tungod kay uban nila karon ang katawhan sa kalibutan nga padayong nakigbisog hangtud tinuod nilang makab-ot ang kagawasan gikan sa henosidyo ug okupasyon.