Pormal nang giablihan ang Jose Maria Sison (JMS) Legacy Museum sa Utrecht, The Netherlands niadtong Setyembre 19. Ang pag-abli gipasiugdahan ni Ka Julie de Lima, byuda ug kaubang-rebolusyonaryo ni Ka Joma, uban ang mga higala, mga tigsuporta ug lokal nga upisyal sa syudad.

Ang JMS Legacy Museum usa ka espasyo nga maghatag importansya sa kinabuhi ug mga legasiya ni Ka Joma. Gidumalahan kini sa JMS Legacy Foundation, nga naglaum nga makahatag og inspirasyon ang museo sa mga mosunod nga henerasyon.

Makita sa museo ang kinabuhi ni Ka Joma isip usa ka matinud-anong rebolusyonaryo, tinuod nga internasyunalista, respetadong intelektwal, ug iladong magbabalak. Makita usab dinhi ang pipila ka mga bidyo sa ulahing pakighinabi ni Ka Joma, iyang mga litrato, dokumento ug uban pa. Abli ang museo alang sa mga gustong moadto ug mobisita.