Gipangayo sa 21 organisasyon sa mga abugado ug tigpanalipud sa tawhanong katungod sa International Criminal Court (ICC) niadtong Setyembre 29 nga pahamtangan og aksyong pangdisiplina ang abugado ni Rodrigo Duterte nga si Nicolas Kaufman tungod sa balik-balik niyang pagtuis ug pagpakaylap og sayop nga impormasyon kalabot sa kaso ni Duterte. Lakip sa mga grupo ang Karapatan, Duterte Panagutin Network ug Rise Up for Life and Rights.

Matud nila, gituis ni Kaufman ang aktwal nga mga paghitabo ug pamahayag aron malingla ang korte. Usa dinhi ang gipakaylap niya nga miuyon ang prosekusyon, ug bisan ang gubyerno sa Pilipinas, sa petisyon alang sa interim release o temporaryong pagpagawas kang Duterte. Gipanghimakak kini pareho sa prosekusyon ug sa gubyerno sa Pilipinas.

Pipila ka semana ayha niini, gipubliko sa ICC ang tulo ka mahinungdanong dokumento nga nagasuporta sa kaso batok kang Duterte: ang Document Containing the Charges (DCC), usa ka listahan sa 181 ebidensya, ug usa ka pre-confirmation brief, nga adunay petsang Hulyo 4.

Unod sa DCC ang tulo ka count o kaso sa krimen batok sa katawhan nga giatubang unta kang Duterte kung nadayon ang kumpirmasyon sa iyang kaso niadtong Setyembre 23. Bisan og kulang ug limitado ang gipasakang kaso, ginaila na usab sa mga biktima ang DCC isip “mahinungdanong lakang ngadto sa hustisya.”