Gipahamtangan sa rebolusyonaryong kalihukan og silot kamatayon si Garde Francisco, aset paniktik sa 15th IB ug adunay patung-patong nga kasong kriminal batok sa rebolusyonaryong kalihukan ug sa mga sibilyan.

Napatay siya sa pag-atake sa Bagong Hukbong Bayan (BHB)-Southwest Negros (Armando Sumayang Jr) sa iyang balay sa Sityo Lumbia, Barangay Kamansi, Kabankalan City, Negros Occidental niadtong Oktubre 3 sa gabii.

Imbwelto si Francisco sa tulo ka dakung kaso sa pagpatay sa mga sibilyan, rebolusyonaryong lider ug Pulang manggugubat sa isla sa Negros.

Usa sa iyang mga kaso ang pagtabang sa militar sa pagpatay kang Ericson Acosta, konsultant sa kalinaw sa National Democratic Front (NDF)-Negros, ug kauban niyang lider-mag-uuma nga si Joseph Jimenez sa Barangay Kamansi niadtong Nobyembre 30, 2022.

Imbwelto usab si Francisco sa pagmasaker sa mga armadong ginsakpan sa estado sa dili armadong mga upisyal sa gimbutahong medikal sa BHB, kauban ang usa ka 6-ka-bulang mabdos, ug usa ka sibilyang drayber sa Barangay Tabugon niadtong Setyembre 21, 2023. Imbwelto usab si Francisco sa kaso sa pagkamartir sa Kabankalan 7 sa Barangay Tapi niadtong Abril 27.

Matud ni Ka Andrea Guerrero, tigpamaba sa BHB-Southwest Negros, ang armadong aksyon kabahin sa pagkab-ot sa hustisya sa mga biktima sa pag-atake sa estado ug magsilbing pahinumdum usab sa mga adunay “utang nga dugo” sa rebolusyon. “Dili malimtan ang kasaysayan sa inyong mga krimen, ug panalipdan sa BHB ang hustisya,” matud niya.

Sa Samar, unang nakapabuto ang BHB-Western Samar (Arnulfo Ortiz Command) batok sa nag-operasyong tropa sa 8th ID sa Sityo San Pedro, Barangay Poblacion 3, San Jose de Buan niadtong Setyembre 27 sa hapon. Usa ka sundalo ang napatay ug daghan ang nasamdan sa mga berdugo.

Sa Oriental Mindoro, gipakyas sa BHB-Mindoro (Lucio de Guzman Command) ang pag-atake sa tropa sa 203rd IBde ug 2nd CMO Battalion sa temporaryong kampo niini sa Sityo Badyang, Barangay San Roque, Bulalacao niadtong Oktubre 1. Organisadong nakabalos og buto ang hukbong bayan nga nagdis-organisa sa kaaway hinungdan nga sila miatras.

Niadtong Setyembre 25, nakadepensa usab ang BHB-Mindoro batok sa nang-atakeng pwersa sa 203rd IBde sa Sityo Barayong, Barangay Manuol, Mansalay. Tulo ka sundalo sa 203rd IBde ang napatay sa panagsanga, samtang daghan pa ang nasamdan.