Dirudiretso an pagbuto han mga rali ngan demonstrasyon han mga demokratiko nga klase ngan sektor ha magkalain-lain nga dapit han nasud ha naglabay nga duha kasemana agud padayon nga kundenahon an hiluagan nga korapsyon han rehimen Marcos. Tuntungan nira an rali han gatus-gatos kayukot nga Pilipino ha Luneta Park ha Manila ngan kasunod nga martsa ha Mendiola.

Ha dako nga protesta hadton Septyembre 21, binuto an komprontasyon ha Mendiola ngan kahilabaon han Recto. Nakuhaan ha mga bidyo an brutal nga pagtapo han mga pulis ha mga kabatan-unan, pagbalbag ha ira han batuta, pagbanyak ngan pagdanas. Nahireport liwat an panmusil han mga pulis ngan paglabog han tirgas.

Waray mahadlok an mga kabatan-unan ngan katawhan ha iginpakita nga kamadarahug ngan brutalidad han armado nga pwersa han rehimen Marcos han madarahug hini nga buhagon an protesta ngan komprontasyon. Diri mamenos ha 277 nga indibidwal, kaupod an 91 nga menor de edad (9 anyos an pinakabata), an gindakop han mga pulis.

Namatay an trabahador ha konstruksyon nga hi Eric Saber nga naigo han bala ha liog han nagpabuto nga pulis. Tikang hi Saber ha iya trabaho ha Pasay City, hinaw-as ha Recto Station ngan titabok para sumakay han dyip han pusilon hiya tikang ha likod. Nadara hiya ha ospital kundi namatay gihapon hadton Septyembre 23. Namatay liwat ha butnga han komprontasyon an 15-anyos nga hi Mark Chustin Serbo, kaupod ha mga nagprotesta, nga ginbuno han usa nga 52-anyos nga sibilyan.

Nahiagum han kamadarahug ha kamot han mga pulis an mga gin-aresto ngan iginpriso. Kaupod ha ira an mga bata ngan kabatan-unan, estudyante, trabahador, mga empleyado han BPO, ngan pira nga gintarget han pulis tungod la kay aada hira ha lugar han banggaay. Nagtikang la nga pagawason an mga gin-aresto hadton Septyembre 25 kahuman an ginpaiha ngan gindelatar nga pagpuproseso han mga pulis ngan husgado ha ira kaso. Damo an ginkinahanglan nga magpiyansa para makagawas tikang ha luun-luon nga mga kaso.

Ginpagawas liwat an mga menor-de-edad nga gindakop ngan gin-aresto nga iginkonsidera nga dabi ha kasamok bisan kun waray klaro nga imbestigasyon. An pira ha ira igin-atubang pa ni Manila City Mayor Isko Moreno Domagoso ha publiko ngan midya, talapas ha katungod han kabataan ngan tukma nga proseso ha balaud.

Nanawagan an mga grupo ha tawhanon nga katungod han bug-os ngan independyente nga imbestigasyon agud papagbatunon an ngatanan nga dabi ha kamadarahug. Ginkundenar liwat nira an “cover-up” ha mga krimen han estado kontra ha katawhan.

Nagios an katawhan

Padayon nga naghuhurma an kagiusan kontra korapsyon ha porma han mga walkout, mga piket-protesta nga gintatawag nga Black Friday Protest, ngan bungto-bungto nga paggios han mga sektor ngan grupo. Yukut-yukot an utro nga nagparayaw ha Metro Manila, Isabela, Bulacan, Pampanga, Laguna, Palawan, Naga City, Davao City, Davao Oriental, ngan iba pa nga mga syudad ngan prubinsya.

Kasunod han serye han walkout hadton syahan nga tulo kasemana han Septyembre, utro nga nahirekord an makasaysayan nga mga walkout ha Far Eastern University (1,000), University of Sto. Tomas (1,500), De La Salle University-Manila at College of St. Benilde (1,500), Philippine Normal University (1,000), Isabela State University (500), DLSU-Laguna, UP Visayas (800), Ateneo de Davao University (1,000), Brokenshire College Inc. ngan Davao Oriental State University. Guliat han kabatan-unanan bisan ha mga konsyerto ngan mga pag-uyag: “Ikulong na `yan, mga kurakot!”

Nag-walkout liwat an gatus-gatos nga mga magturutdo ngan trabahador ha edukasyon hadton Oktubre 3 komo pagsukna ha korapsyon ngan pagselebrar ha World Teachers’ Day.

Ha Bulacan, nga iginkukunsidera nga sentro han anomaliya ha mga proyekto nga flood control, nabubug-os an higlapad nga pagkaurusa han katawhan kontra ha korapsyon. Ginios an mga Bulakenyo ha 12 nga syudad ngan bungto ha prubinsya ngan natindog kontra ha mga lokal ngan nasyunal nga ahensya han gubyerno nga nadadabi ha korapsyon. Nagbubug-os hira han mga grupo ngan alyansa.

Gin-eespiho han natikapintas nga mga protesta an hilarum nga diskuntento han mga Pilipino ha atubangan han krisis ha ekonomiya ngan pulitika nga nahampak ha naghahadi nga sistema. Manipestasyon ini han hiluagan nga sentimyento han hiluag nga masa nga nag-aantos ha korapsyon ngan natikagrabe nga mga problema han bagakolonyal ngan bagapyudal nga sistema.