Ginbug-os diri pala maiha han mga Negrosanon an GMO-Free Negros Coalition, usa nga asosasyon han 82 nga indibidwal ngan organisasyon tikang ha sektor han parag-uma, non-governmental organization, tawo ha singbahan, estudyante, akademiko, tag-iya han mga hotel ngan restawran ngan pribado nga sektor agud tipahan ngan atuhan an plano nga pagsulod han mga tanum nga GMO (genetically-modified organism) ha prubinsya.

Igin-iinsister nira nga kinahanglan sundon an mga ordinansa nga nagdidiri ha pagsulod, pagtanum, pagpapatubo, pagtesting ngan distribusyon han buhi nga GMO ha isla.

Hadton 2023, nagpahayag han interes an San Miguel Corporation nga mamuhunan ha prubinsya para ha pabrika han tubong ngan proyekto nga manukan. Agud madayon an proyekto, nagsalawad han plano nga ordinansa hadton Agosto 26 an lokal nga gubyerno agud matugutan an pagtatanum han mga korporasyon han GMO nga mais.

Hadton Septyembre 30, naghatag han upat nga position paper an koalisyon ha Sangguniang Panlalawigan agud ayaton an ginproponer nga ordinansa. Naglansar liwat han paggios an mga kabatan-unan nga estudyante tikang ha magkalain-lain nga konseho, organisasyon ngan publikasyon hadton Septyembre 18 ha Bacolod City agud ipahayag an ira pagtipa.

Nagpahayag liwat han mahugot nga pagtipa dinhi an National Democratic Front-Negros. Sering hini, dugang nga maluludlod an mga parag-uma ha kakurian kun pababay-an nga sumulod an GMO ha prubinsya tungod kay mapipiritan hira nga sumarig ha mga imported nga liso han GMO ngan mga input nga kontrolado han langyawanon nga korporasyon. Delikado liwat ha kalibsugan an GMO tungod ha epekto hini ha lawas sugad han allergy, antibiotic resistance, cancer ngan panmaihaan nga pagkahibang han internal organ han tawo.