Ginhangyo han 21 nga organisasyon han mga abugado ngan tagdepensa han tawhanon nga katungod ha International Criminal Court (ICC) hadton Septyembre 29 nga mag-imponer han aksyon pandisiplina an abugado ni Rodrigo Duterte nga hi Nicolas Kaufman tungod ha pauru-utro niya nga pambibirikis ngan pagpapasarang han sayop nga impormasyon kasumpay ha kaso ni Duterte. Kaupod ha mga grupo an Karapatan, Duterte Panagutin Network ngan Rise Up for Life and Rights.

Sering nira, ginbirikis ni Kaufman an aktwal nga mga panhitabo ngan pahayag agud mauwat an korte. Usa hini an iginpasarang niya nga inabuyon an prosekyusyon, ngan hasta an gubyerno han Pilipinas, ha petisyon para ha interim release o temporaryo nga paggawas ni Duterte.

Pira kasemana antes hini, iginsapubliko han ICC an tulo nga importante nga dokumento nga nagsusuporta ha kaso kontra kan Duterte: an Document Containing the Charges (DCC), usa nga listahan han 181 nga ebidensiya, ngan usa nga pre-confirmation brief, nga may petsa nga Hulyo 4.

Unod han DCC an tulo nga counts o ihap han mga krimen kontra ha katawhan nga iginsalawad unta kan Duterte kun nadayon an kumpirmasyon han iya kaso hadton Septyembre 23. Bisan kun kulang nga limitado an iginsang-at nga kaso, ginkokonsidera na liwat han mga biktima an DCC komo “importante nga pitad ngadto ha baratunon.”