Ha ikatulo nga higayon, iginpadelatar han Commission on Elections (Comelec) an parlamentaryo nga eleksyon han Bangsamoro Autonomous Region in Muslim Mindanao (BARMM) nga nakatalaan unta nga himuon ha Oktubre 13. Kahuman ini igdeklara han Korte Suprema nga talapas ha konstitusyon an Bangsamoro Autonomous Act 77 (BA 77 o Redistricting Bill), nga nakatalaan nga ibalhin an pito nga posisyon ha parlamento nga orihinal nga nakaalutaga para ha Sulu ngan iba pa nga distrito han BARMM.

Ginmanduan han korte an Bangsamoro Transition Authority (BTA) nga maghimo han bag-o nga bahinay han mga distrito ngan igsubmiter ini ha korte ha Oktubre 30. Iginbalhin liwat hini an paglansar han eleksyon ha katapusan na han Marso 2026. Nangangahulugan ini han pagkarag ha ₱1.2 kabilyon nga pondo nga nagamit na han Comelec ha pangandam ha eleksyon.

Gintatan-aw han katawhan Moro an utro nga pagpapadelatar komo usa na liwat nga kapakyasan agud ipatuman an tinuod nga otonomiya ha ira mga teritoryo. Antes pa igpagawas an desisyon, gintipahan na nira an pagpapaundang han Comelec ha pangandam basar ha temporary restraining order ha Korte Suprema kontra ha BAA 77. Sering nira, diri la hiunong ha pagboto an eleksyon. Mas importante, pagrespeto ini ha otonomiya, pagrespeto ha mga kasarabutan ha kamurayawan ngan pagpapadig-on ha katungod ha pagdedesisyon-ha-kalugaringon han katawhan Moro.