Waray hunong an pagrabunos han kagiusan protesta kontra ha korapsyon ngan burukrata kapitalismo han rehimen US-Marcos. Ha magkalain-lain nga dapit han nasud, dirudiretso an mga walkout, rali ngan martsa ha mga eskoylahan, komunidad, pabrika ngan upisina. Mahugot nga iginpapahayag han katawhan nga ludlod ha kakurian ngan pag-inantos an ira abot-langit nga kangalas ha higante nga pangawat han mga korap ha reaksyunaryo nga gubyerno ha bilyun-bilyon kapiso nga pondo han katawhan.

Ha paghinumdom ha ika-53 nga anibersaryo han balaud militar han diktadura nga Marcos hadton Septyembre 21, gatus-kayukot an binaha ha mga kakalsadahan han Manila ngan iba pa nga syudad. Agud suknaon hi Marcos komo utok ha likod han korapsyon ngan maanomaliya nga flood control projects, narunapulo kayukot an nagmartsa tipakadto ha Mendiola. Nag-aningal an ira mga guliat tubtub ha Malacañang. Binuto an diri na mapugngan nga kangalas han katawhan, labina han mga kabatan-unan. Gintapo hira han brutal nga panmuypoy han mga bantay nga pulis.

Ha direkta nga mando ni Marcos nga puypuyon an mga kabatan-unan ngan katawhan nga nagpagawas han araba ngan nagpakita han kangalas, grabe nga nangangalas nga inatake an de-batuta ngan armado nga mga pulis. Nag-aningal an mga buto han pusil ngan pagsabog han tirgas. Ginbombahan tubig ngan wala-tuo nga gindakop an mga raliyista ngan hin-o man nga matyempuhan. Usa nga trabahador an napatay ha kalsada ha panmusil han pulis. Diri mamenos ha 277, kaupod an pira kanapulo nga menor de edad, an igindetiner ha magkalain-lain nga istasyon han pulis, ngan iligal nga iginpriso, gin-abuso, gintortyur ngan ginsalawdan hin bisan ano nga kaso.

Iginpakita ni Marcos an iya pasista nga pangil ha larang nga tarhugon an katawhan ngan pugngan an pagdako pa han ira mga gios-protesta ha kakalsadahan. Ginpagawas han Malacañang nga an “kasamok” ha Mendiola ginhimo han “pipira nga pasimuno” ha larang nga pagbuhag-buhagon an ranggo han katawhan. Sukwahi ha katuyuanan ni Marcos, dugang nga nagkaurusa an katawhan. An guliat para ha pagpapagawas ha Mendiola 277 dugang nga nag-urusa ha magkalain-lain nga sektor—mga estudyante, kablas ha syudad, trabahador, mga abugado, tawo ha singbahan, pankultura nga trabahador ngan iba pa.

Imbes nga mahadlok, mas naggrabe an naglalarab nga kaburut-on han katawhan kontra ha korapsyon ngan mga anomaliya han rehimen Marcos. Ha sinunod nga mga adlaw ngan semana, mas nagdamo pa an mga estudyante nga ginawas ha ira mga klase ngan pinartisipar ha mga rali ha sakob ngan gawas han ira mga kampus—tikang ha norte han Luzon tubtub ha Mindanao. Haros waray adlaw an linabay ha nakaagi nga mga semana nga waray gios-protesta agud ipadangat an guliat han katawhan nga nagdedemanda han hustisya ngan nananawagan para baguhon an dunot nga sistema.

Atubangan han nagpapadayon nga rabunos han gios-protesta, todo-larga yana an rehimen Marcos nga pakalmahon an kangalas han katawhan pinaagi han mga buaw nga pasalida han imbestigasyon. Kundi tungod kay diri iginsasapubliko an imbestigasyon han gin-ngaranan nga “independyente nga komisyon,” dugang la nga nagkukusog an pagtuod han katawhan nga usa la ini nga pamaagi agud tahuban an tinunod nga kahiluagon ngan tinuod nga utok han korapsyon—hi Marcos mismo ngan pinakasuok niya nga mga upisyal. Naaamyon gud han katawhan an hurak han aregluhay han igkasi mga korap agud makalikay ngan makaalinggawas ha gindedemanda nga sirot han katawhan.

Ginbabay-og han nadaguhob nga guliat han katawhan an bug-os nga naghahahdi nga sistema. Naalisngaw an baho han korapsyon ha bug-os nga nasud. Natikadamo an nabubuksas nga anomaliya—tikang ha mga flood control project tubtub ha mga tulay ngan farm-to-market road, klasrum, hasta na mga bilding ngan pagpapahusay han mga kampo militar, bilyun-bilyon nga pan-intelidyens nga pondo, ha programa nga “balik-pusil” ngan iba pa. Dugang pa yan nga nagtuturudlukay an mga pulitiko nga magkakaribal ngan magkakaalyado. Mas natikagrabe liwat an banggaay han paksyon nga Marcos ngan Duterte. Ludlod ha lusak han korapsyon an Senado ngan Kongreso. May lagay ha nawong bisan an mga nagpapakamalimpyo.

Hul-os nga nabubuksas an burukrata kapitalismo ngan an gin-gagamutan hini nga dunot nga sistema nga ginpapamunuan yana ni Marcos—hadi han korap ngan numero uno nga pasista nga terorista. Nagkukusog ngan nahiluag an panawagan han ordinaryo nga katawhan agud patalsikon ngan sirutan an ngatanan nga korap nga nagkawat ha pondo han katawhan, ha pangunguna ni Marcos ngan igkasi korap nga ha Vice President Sara Duterte, ngan tapuson an bug-os nga sistema nga mabug-at nga paras-anon han katawhan.

Samtang padayon nga nagkukusog an ira guliat ngan pag-ato, kinahanglan mas padig-unon han katawhan an ira ranggo agud sagangon, atuhan ngan pakyason an atake han pasista nga estado. An madarahug nga pagpuypoy han pulis ha Mendiola espiho la han mas hiluag ngan sistematiko nga pag-abuso han mga armado nga pwersa han reaksyunaryo nga estado ha mga katungod han katawhan, ha kasyudaran ngan ha kabaryuhan. Agud igpabilin an naghahadi nga sistema, gin-gagamit ni Marcos yana an bug-os nga kusog han pasista nga estado. Ha pira kagatos nga barangay ha kabaryuhan nga aada ha ilarum han kontrol han militar, wala-tuo an mga kaso han panmatay, iligal nga pagdakop, tortyur, ngan iba pa nga mga grabe nga pagtalapas ha mga tawhanon nga katungod.

Segurado nga mapapakyas an rehimen Marcos nga pugngan an nagpapadayon nga pagrabunos han kagiusan protesta kontra ha korapsyon. Natikahiluag ngan natikadako an pankatilingban nga pagbubuhat han mga estudyante ngan kabatan-unan. Dara nira an karayhak ngan determinasyon ha kagiusan protesta han katawhan. Dugang naman hira nga magrarayhak ngan magigin determinado kun hira mapakadto diri la ha kakalsadahan, kundi hasta ha mga eskinita han mga komunidad, ha mga dalan ngadto ha mga pabrika, hasta ha pinakatay-aw nga mga parte han nasud.

Ayat ha mga kabatan-unan nga itig-ob an ira ranggo ha milyun-milyon nga trabahador ngan hiluag nga ranggo han masa nga baga-proletaryado o waray pakabuhi ha kasyudaran, ngan ha masa nga parag-uma ha kabaryuhan. Ha mga tiarabot nga semana ngan bulan, an naghahadi nga sistema segurado dugang pa nga babay-ugon han kagiusan protesta kontra ha korapsyon ngan burukrata kapitalismo ha paghiluag hini ha bug-os nga nasud ngan pagtig-ob han mas hiluag pa nga ihap han katawhan ha kasyudaran ngan kabaryuhan.

Kinahanglan magpabilin nga aada ha butagtok ngan unhan han demokratiko nga kagiusan protesta an mga organisado nga nasyunal-demokratiko nga pwersa agud seguruhon nga madig-on, militante ngan dirudiretso ini nga naabante. Kinahanglan waray kasumo nira nga pukawon an katawhan nga an pakigbisog kontra ha korapsyon nakasumpay ha rebolusyunaryo nga pakigbisog para ibagsak an tulo nga demonyo han imperyalismo, pyudalismo ngan burukrata kapitalismo. Mahipapasulong ini pinaagi han panmaihaan nga gerra han katawhan ngan armado nga pakig-away agud tapuson an sistema nga bagakolonyal ngan bagapyudal, ngan tukuron an tinuod nga demokratiko nga gubyerno ngan talwas ngan progresibo nga katilingban.