Ha tiarabot nga Oktubre 7, hihinumduman han kalibutan an ikaduha katuig nga anibersaryo han makasaysayan nga Al Aqsa Flood, an armado nga opensiba tikang ha tuna, dagat ngan kahanginan han mga pwersa nga Palestino, nga ginpamunuan han Hamas ngan han Izz ad-Din al-Qassam Brigades, kontra ha mananakop nga Israel.

Ginpalarab han opensiba an hingyap han katawhan Palestino agud tapuson an 75-katuig nga gerra nga agresyon han Israel. Suportado han US an okupasyon ha mga teritoryo nga Palestino, kalakip an nagpapadayon nga pag-ensirkulo ha Gaza, ngan mga pag-atake ha mga komunidad ha West Bank.

Ha sumunod nga duha katuig, waray hunong nga ginbomba han Zionista nga Israel, ha bulig han imperyalismo nga US ngan mga alyado nga nasud ha Europe, an sibilyan nga populasyon han Gaza. Ginrumok hini an mga ospital, singbahan, eskoylahan, apartment, bilding ngan bisan mga evacuation center.

Inabot ha masobra 66,500 nga Palestino an ginpatay, 18,500 mga bata. Namatay naman an 453 tungod ha malnutrisyon ngan gutom. Aada ha 254 na nga mga mamamahayag an ginpatay. Hadton Marso, hul-os na nga gin-ulang han Israel an pagsulod han ayuda ha syudad, samtang gin-gamit han mga sundalo nga Israeli ngan mga mersenaryo nga Amerikano an distribusyon hini agud patayon an mga Palestino. Hadton Septyembre, bisan kun ura-ura nga nauurhi, igindeklara han United Nations Commis-sion of Injury an ginhimo han Israel ha Gaza komo henosidyo.

Talwason an Palestine!

Testigos an katawhan ha bug-os nga nasud ha katukmaan han armado nga pakig-away han mga Palestino agud matalwas tikang ha okupasyon ngan henosidyo han Zionista nga Israel. Nagkaurusa an mga katawhan agud ipakita an ira kangalas ha henosidyo, samtang iginduduso an kada ira gubyerno nga tumindog para ha mga Palestino. Yukut-yukot nga paggios nga may magkalain-lain nga porma, ha magkalain-lain nga parte han kalibutan, ngan ginpapartisiparan han milyun-milyon nga katawhan an waray hunong nga iginlansar. Nagkaurusa an mga nasud tikang ha Africa, Asia ngan Latin America agud maglansar han kampanya nga ligal kontra ha okupasyon, agud papagbatunon ini ha mga krimen ha gerra.

Hadton Nobyembre 2024 nagpagawas an International Criminal Court han mandamyento de aresto kontra kan Prime Minister Benjamin Netanyahu han Israel ngan kan Yoav Gallant, hadto anay ministro han depensa para ha kaso nga krimen ha gerra ngan krimen kontra ha katawhan. Ha tiarabot nga Nobyembre, iglalansar an International People’s Tribunal para ha Palestine han International League of Peoples’ Struggle ngan International Association of Democratic Lawyers agud igsadokumento ngan desisyunan an mga krimen ha gerra, henosidyo, ecocide ngan hiluagan nga pagpagutom han Israel ngan han US kontra ha mga Palestino.

Hadton Agosto, naglayag an gintawag nga Global Sumud Flotilla, nga ginbubug-os han 44 nga barko nga may sakay nga sobra 400 katawo, agud magdul-ong han serbisyo ngan ayuda ha Gaza. Bisan kun gin-ulang han Israel Defense Forces (IDF) an mga barko hadton Oktubre 2, nanindugan an mga nagpartisipar hini nga diri hira maundang ha pagbuong ha pangatake han Israel ha Gaza.

Bisan an mga katawhan han Israel naato ngan natipa ha mga pitad han kalugaringon nira nga gubyerno. Damo nga kabatan-unan nga Israeli an ginpipili nga magpapriso imbes nga sumakob ha IDF.

Ha Pilipinas, padayon nga nagios an mga organisasyon agud maghatag han suporta ngan pakikig-usa ha pag-ato han mga Palestino, sugad han Youth for Palestine ngan Palestine-Philippines Friendship Association. Naglansar liwat han kampanya para pugngan an rehimen US-Marcos ha pagpalit han armas ha Israel. Bisan ha iba nga nasud, nagin parte an mga Pilipino nga migrante ha mga paggios para ha pagtatalwas han Palestine.

Ha presente, aada ha proseso han negosasyon an Hamas, an Israel ngan US, subay ha ginbug-os nga programa para ha erestorya pankamurayawan para ha Gaza ni Donald Trump, presidente han US, nga waray pagkonsidera ha mismo nga katawhan hini.

Ha luyo han paglipol nga nahihiaguman han mga Palestino, padayon pa liwat an ira pag-ato pinaagi han armado ngan diri armado nga pakig-away. Sigon kan Leila Khaled, membro han Popular Front for the Liberation of Palestine, segurado nga maabot gihap an katalwas han mga Palestino tungod kay kaupod nira yana an katawhan han kalibutan nga padayon nga naato tubtub nga tinuod nira nga makab-ot an katalwasan tikang ha henosidyo ngan okupasyon.