Waray hunong an pagsabrag han kamadarahug han rehimen Marcos ngan armado nga pwersa hini kontra ha katawhan ha naglabay nga mga semana. Nahirekord an duha nga kaso han pagpatay, panmusil ngan pan-gigipit ha mga lider-masa ha Visayas.

Hadton Oktubre 5 han gab-i, ginpatay han ginkumbinar nga pwersa han militar ngan pulis hi Roberto Cabales ngan parag-uma nga hi Matteo Suarez ha Barangay Coto, Lambunao, Iloilo. Ginpagawas han pulis ngan militar nga inato an duha samtang ginsasaladwan han mandamyento de aresto. Ginpahimuwaan han rebolusyunaryo nga kagiusan ha Panay ini nga akusasyon ngan ginsering nga diri armado an duha.

Ha Samar, ginpatay han 43rd IB ngan han paramilitar nga Dos an parag-uma nga hi Veronico “Tatay Birong” Anterio, 65, hadton Septyembre 16 ha Barangay Carolina, Matuguinao. Gintarget hiya tungod kay nagserbe hiya nga tingog han pag-ato ha militar nga paghahadi han 43rd IB ngan han grupo nga paramilitar nga Dos ha ira komunidad. Maisugon nga inatubang hi Anterio ha mga pasista agud suknaon an mapan-gipit nga pitad nga igin-imponer ha Carolina nga ginkakampuhan han 43rd IB.

Panmusil. Nangistraping an mga gwardya ngan pribado nga armado nga pwersa ha mga trabahador ha uma ha Hacienda Escolastica, Barangay Mabini, Cadiz City, Negros Occidental hadton Septyembre 30. Pito nga parag-uma an nasamaran ha panhitabo. Ginpanwakay ngan ginkawat gihap han mga gwardya an mga tanum nga mais han mga parag-uma. Gin-gigipit hira tungod ha ira pag-ato para ha katungod ha tuna ha asyenda.

Pan-gigipit. Ginsalawdan han mga pulis han reklamo nga pagtalapas ha Batas Pambansa 880 o an Public Assembly Act an mga lider-masa han Cebu nga hira Nanay Bebe Allere han Panaghugpong-Kadamay, Jaime Paglinawan han Bagong Alyansang Makabayan-Centra; Visayas, John Ruiz han Bayan Muna, Howell Villacrucis han AMA-SUGBO-KMU, ngan iba pa hadton Septyembre 29. An reklamo kasumpay ha protesta kontra korapsyon ha Cebu City District Engineering Office han Department of Public Works and Highways Region VII hadton Septyembre 5.

Samtang, nahiagum liwat han pan-gigipit ngan Red-tagging tikang ha 503rd IBde hi Beatrice “Betty” Belen hadton Septyembre 28-29 han kadtuon hiya ha Barangay Uma Del Norte, Lubuagan, Kalinga. Natindog hiya yana nga tagapangulo han Inaabuyog-Kalinga ngan hadto anay nga priso pulitikal.