Nagtirok hadton Septyembre 30 ha San Pablo Apostol Parish Church ha Manila an gatus-gatos nga residente han Smokey Mountain ngan iba pa nga barangay han Tondo, ngan mga lider-relihiyoso ngan maka-kalibungan nga grupo agud tukuron an Manila Anti-Incinerator Alliance (MAIA). An katitirok, nga igintuman ha paghinumdom ha Day of Action Against Incineration, may tuyo nga atuhan an plano nga pagtitindog hin ₱26-kabilyon nga waste-to-energy (WTE) incinerator ha Barangay 128, Smokey Mountain.

An proyekto usa nga 100 megawatt nga WTE Incineration Plant nga iginduduso han Manila Integrated Environment Corp. (MIEC), kompaniya nga kontrolado han Philippine Ecology Systems Corp. (PHILECO) nga pananag-iya han negosyante nga hi Reghis Romero II. Suportado ini han kompaniya nga Japanese nga Kanadevia Corporation ngan nakabalayan an pagtitindog ha hiluagan nga Port Modernization ha kahilabaon han pantalan ha Manila.

Kalakip an planta ha iginkokonsidera nga mga prayoridad nga proyekto han rehimen Marcos ngan lokal nga gubyerno han Manila ha pangunguna ni Isko Moreno. Sigon ha mga eksperto, maraot ha kalibsugan an iginbubuga nga aso han incinerator. Dugang dinhi, masobra 2,000 kapamilya o 23,000 nga residente ngan mangangalakal (paragpurot han karton ngan bote para ibaligya) an mapalalayas ha lugar han konstruksyon hini.