Ginpatukan han rebolusyunaryo nga kagiusan han sirot hi Garde Francisco, aset paniktik han 15th IB ngan mayda luun-luon nga kriminal nga kaso kontra ha rebolusyunaryo nga kagiusan ngan mga sibilyan.

Napatay hiya ha pag-atake han Bagong Hukbong Bayan (BHB)-Southwest Negros (Armando Sumayang Jr) ha iya balay ha Sityo Lumbia, Barangay Kamansi, Kabankalan City, Negros Occidental hadton Oktubre 3 han gab-i.

Dabi hi Fransisco ha tulo nga dagko nga kaso han pagpatay ha mga sibilyan, rebolusyunaryo nga lider ngan Pula nga mangaraway ha isla han Negros.

Usa ha iya mga kaso an pagbulig ha militar ha pagpatay kan Ericson Acosta, konsultant ha kamurayawan han National Democratic Front (NDF)-Negros, ngan upod niya nga lider-parag-uma nga hi Joseph Jimenez ha Barangay Kamansi hadton Nobyembre 30, 2022.

Dabi liwat hi Francisco ha pagmasaker han mga armado nga tawuhan han estado ha diri armado nga mga upisyal ha buruhaton medikal han BHB, kaupod an usa nga 6-kabulan nga burod, ngan usa nga sibilyan nga drayber ha Barangay Tabugon hadton Septyembre 21, 2023. Dabi liwat hi Francisco ha kaso han pagkamartir han Kabankalan 7 ha Barangay Tapi hadton Abril 27.

Sigon kan Ka Andrea Guerrero, tagapagyakan han BHB-Southwest Negros, an armado nga aksyon kaparte han pagkab-ot han hustisya ha mga biktima han pag-atake han estado ngan magseserbe nga pahinumdom liwat ha mga mayda “utang nga dugo” ha rebolusyon. “Diri mahingangalimtan an kasaysayan han iyo mga krimen, ngan ipapakig-away han BHB an hustisya,” sering niya.

Ha Samar, una nga nakapabuto an BHB-Western Samar (Arnulfo Ortiz Command) kontra ha nag-ooperasyon nga tropa han 8th ID ha Sityo San Pedro, Barangay Poblacion 3, San Jose de Buan hadton Septyembre 27 han kulop. Usa nga sundalo an napatay ngan damo an nasamaran ha mga berdugo.

Ha Oriental Mindoro, ginpakyas han BHB-Mindoro (Lucio de Guzman Command) an pag-atake han tropa han 203rd IBde ngan 2nd CMO Battalion ha temporaryo nga kampo hini ha Sityo Badyang, Barangay San Roque, Bulalacao hadton Oktubre 1. Organisado nga nakabulos han buto an hukbo han katawhan nga nakapagdis-organisa ha kaaway hinungdan para umatras hira.

Hadton Septyembre 25, nakapagdepensa liwat an BHB-Mindoro kontra ha naatake nga pwersa han 203rd IBde ha Sityo Barayong, Barangay Manuol, Mansalay. Tulo nga sundalo han 203rd IBde an napatay ha agway, samtang damo pa nga iba an nasamaran.