Nagtaripnong idi Setyembre 30 iti San Pablo Apostol Parish Church idiay Manila ti ginasut a residente ti Smokey Mountain ken dadduma pay a barangay ti Tondo, ken dagiti lider-relihiyoso ken maka-kalikasan a grupo tapno ibangon ti Manila Anti-Incinerator Alliance (MAIA). Ti taripnong, a naigiddan iti panaglagip iti Day of Action Against Incineration, ket addaan panggep a labanan ti plano a panagitakder ti ₱26-bilyon a waste-to-energy (WTE) incinerator idiay Barangay 128, Smokey Mountain.

Ti proyekto ket maysa a 100 megawatt a WTE Incineration Plant nga idurduron ti Manila Integrated Environment Corp. (MIEC), kumpanya a kontrolado ti Philippine Ecology Systems Corp. (PHILECO) a tagikua ti negosyante a ni Reghis Romero II. Suportado daytoy ti kumpanya a Japanese a Kanadevia Corporation ken nakabalangkas iti panagitakder iti nasaknap a Port Modernization iti sangladan iti Manila.

Ti planta ket karaman iti maitudtuding a prayoridad a proyekto ti rehimen Marcos ken lokal a gubyerno ti Manila iti panangiyuna ni Isko Moreno. Segun kadagiti eksperto, makapadakes iti salun-at ti asok nga ipugso ti incinerator. Nayon ditoy, nasurok 2,000 a pamilya wenno 23,000 a residente ken aglaklako ti scrap ti mapatalaw iti lugar ti konstruksyon daytoy.