Dua a kameng ti Komite Sentral ti Communist Party of India (Maoist) ti nasurok 10 aldaw a sikreto a naibalud sakbay nga ingagara a pinatay ti armado a pwersa ti rehimen Modi idi Setyembre 22. Parparwaren ti rehimen Modi a napapatay ti dua iti engkwentro idiay Abujhmad tapno kaluban ti krimen ken libasan ti sungsungbatan daytoy.

Segun kadagiti ulat, kinemmeg ti armado a pwersa ti India da Kadwa Katta Ramachandra Reddy (Raju Dada) ken Kadwa Kadari Satyanarayana Reddy (Kosa Dada), agpada a saan nga armado, idiay Raipur City iti estado ti Chhattisgarh idi Setyembre 10. Maatap nga naipan isuda iti maysa a sikreto a lugar iti baet ti Setyembre 11 agingga Setyembre 20 nu sadinno a posible a nakaro a natortyur da sakbay a napapatay. “Inuulbod ti engkwentro. Rumbeng a babalawen ti amin daytoy,” segun ken Vikalp, mangibagi iti Dandakaranya Special Zonal Committee.

Malaksid iti dua, naimaldit met ti ingagara a pammapatay iti lima pay a lider ken kameng ti Komite Sentral ken Eastern Regional Bureau ti CPI (Maoist) iti napalabas a bulan. Amin da ket maiparparang a napapatay kadagiti engkwentro. Pinadayawan ti partido ti amin a martir ken nagbuwis ti biag iti sango ti narungsot nga Operation Kagar ti rehimen Modi.