Awan sarday ti panangimula ti kinaranggas ti rehimen Marcos ken armado a pwersa daytoy laban iti umili kadagiti napalabas a lawas. Naimaldit ti dua a kaso ti pammapatay, pammaltog ken panaglipit kadagiti lider-masa idiay Visayas.

Idi Oktubre 5 ti rabii, pinatay ti pinagtipon a pwersa ti militar ken pulis ni Roberto Cabales ken ti mannalon a ni Matteo Suarez idiay Barangay Coto, Lambunao, Iloilo. Pinarwar ti pulis ken militar a limmaban ti dua bayat a maiserserbian ti mandamyento de aresto. Inpetteng ti rebolusyonaryo a tignay ti Panay nga inuulbod daytoy a pammabasol ken kunada a saan nga armado ti dua.

Idiay Samar, pinatay ti 43rd IB ken ti paramilitar a Dos ti mannalon a ni Veronico “Tatay Birong” Anterio, 65, idi Setyembre 16 idiay Barangay Carolina, Matuguinao. Pinuntirya da isuna gapu ta nagserbi a timek ti panaglaban iti panagari a militar ti 43rd IB ken ti grupo a paramilitar a Dos iti komunidad da. Natured a simmango ni Anterio kadagiti pasista tapno babalawen ti managlipit nga addang a naiyatnag iti Barangay Carolina nga inokupar ti 43rd IB.

Pammaltog. Nagpalto-paltog dagiti gwardya ken pribado nga armado a pwersa kadagiti mangmangged-talon iti Hacienda Escolastica, Barangay Mabini, Cadiz City, Negros Occidental idi Setyembre 30. Pito a mannalon ti nasugatan iti insidente. Dinadael ken tinakaw met dagiti gwardya dagiti mula dagiti mannalon. Liplipiten da met dagitoy gapu iti panaglaban da para iti karbengan iti daga iti asyenda.

Panaglipit. Pinilaan dagiti pulis ti reklamo a panaglabsing iti Batas Pambansa 880 wenno ti Public Assembly Act dagiti lider-masa ti Cebu a da Nanay Bebe Allere ti Panaghupong-Kadamay, Jaime Paglinawan ti Bagong Alyansang Makabayan-Central Visayas, John Ruiz ti Bayan Muna, Howell Villacrucis ti AMA-SUGBO-KMU, ken dadduma pay idi Setyembre 29. Ti reklamo ket kanaig iti protesta kontra korapsyon iti Cebu City District Engineering Office ti Department of Public Works and Highways Region VII idi Setyembre 5.

Kabayatan na, nakapadas met ti panaglipit ken Red-tagging manipud iti 503rd IBde ni Beatrice “Betty” Belen idi Setyembre 28-29 idi sinarungkaran da isuna idiay Barangay Uma Del Norte, Lubuagan, Kalinga. Tumaktakder isuna kas agdama a pangulo ti Innabuyog-Kalinga ken dati a balud pulitikal.