Inton Oktubre 7, lagipen ti sangalubongan ti maikadwa a tawen nga anibersaryo ti istorikal nga Al Aqsa Flood, ti armado nga opensiba manipud iti daga, baybay ken tangatang dagiti pwersa a Palestino, nga idadauluan ti Hamas ken ti Izz ad-Din al-Qassam Brigades, laban iti mannanakop nga Israel.

Pinabettak ti opensiba ti gagem ti umili a Palestino tapno gibusan ti 75-tawen a gera nga agresyon ti Israel. Suportado ti US ti okupasyon kadagiti teritoryo a Palestino, kabilang ti agtultuloy a panagkubkob iti Gaza, ken dagiti panagatake kadagiti komunidad iti West Bank.

Iti sumaruno a dua a tawen, awan sarday a binomba ti Zionista nga Israel, iti tulong ti imperyalismo a US ken dagiti alyado da a pagilyan iti Europa, ti sibilyan a populasyon ti Gaza. Rinebbek daytoy dagiti ospital, simbaan, pagadalan, apartment, pasdek ken uray dagiti evacuation center.

Dumanon iti nasurok 66,500 a Palestino ti napapatay, 18,500 ti ubbing. Pimmusay met ti 453 gapu iti malnutrisyon ken bisin. Adda iti 254 a peryodista ti napapatay. Idi Marso, naan-anayen a hinarang ti Israel ti panagserrek ti ayuda iti syudad, bayat nga inaramat ti soldado nga Israel dagiti mersenaryo nga Amerikano ti panagibunong ditoy tapno patayen dagiti Palestino. Idi Setyembre, numan pay palalo a naladaw, indeklara ti United Nations Commission of Inquiry ti ar-aramiden ti Israeli idiay Gaza kas henosidyo.

Wayawayaan ti Palestine!

Saksi ti umili iti intero a lubong iti kinausto ti armado a dangadang dagiti Palestino tapno mawayawayaan manipud iti okupasyon ken henosidyo ti Zionista nga Israel. Nagkaykaysa dagiti umili tapno ipakita ti pungtot da iti henosidyo, bayat nga idurduron dagiti gubyerno da a tumakder para iti Palestino. Rinibo a nadumaduma a tignay iti nadumaduma a paset ti lubong, ken dardar-ayan ti minilyon nga umili ti awan ressat a naisayangkat. Nagtitipon dagiti pagilyan manipud iti Africa, Asia ken Latin America tapno agisayangkat ti ligal a kampanya laban iti okupasyon, tapno pagsungbaten daytoy kadagiti krimen iti gubat.

Idi Nobyembre 2024, nagiparuk-at ti International Criminal Court ti mandamyento de aresto laban ken Prime Minister Benjamin Netanyahu ti Israel ken Yoav Gallant, dati a ministro ti depensa para iti kaso a krimen laban iti sangkataw-an. Inton Nobyembre, maangay ti International People’s Tribunal para iti Palestine ti International League of Peoples’ Struggle ken International Association of Democratic Lawyers tapno idokumento ken kedngan dagiti krimen iti gubat, henosidyo, ekosidyo ken nasaknap a panangbisin ti Israel ken ti US kadagiti Palestino.

Idi Agosto, naglayag ti naawagan a Global Sumud Flotilla, a bukbuklen ti 44 a barko a nangilugan ti nasurok 400 katao, tapno agitulod ti serbisyo ken ayuda idiay Gaza. Numanpay naharang ti Israel Defense Forces (IDF) dagiti barko idi Oktubre 2, timmakder dagiti nakipaset ditoy a saan da nga agsardeng iti panangburak iti panagatake ti Israel iti Gaza.

Uray dagiti umili ti Israel ket lumablaban ken sumupsupyat kadagiti addang ti bukod da a gubyerno. Adu a kabataan nga Israeli ti mangpilpili nga agpabalud ngem iti pumauneg iti IDF.

Iti Pilipinas, patuloy nga agtigtignay dagiti organisasyon tapno agited ti suporta ken pannakikaykaysa iti laban dagiti Palestino, kas ti Youth for Palestine ken Palestine-Philippines Friendship Association. Nagisayangkat da met ti kampanya tapno pawilan ti rehimen US-Marcos a gumatang ti armas iti Israel. Uray iti sabali a pagilyan, nakipaset dagiti Pilipino a migrante kadagiti tignay para iti pannakawayawaya ti Palestine.

Iti agdama, adda iti proseso ti negosasyon ti Hamas, ti Israel ken US, basar iti binukel ni Donald Trump, presidente ti US, a programa para iti saritaan iti kapya para iti Gaza, nga awan ti panangikonsidera iti mismo nga umili daytoy.

Iti laksid ti panagrebbek a mapadpadasan dagiti Palestino, agtultuloy latta ti panaglaban da babaen ti armado ken saan nga armado a dangadang. Segun ken Leila Khaled, myembro ti Popular Front for the Liberation of Palestine, sigurado a dumteng to met laeng ti wayawaya dagiti Palestino gapu ta kadwa da tatta ti umili ti sangalubongan nga agtultuloy a lumablaban agingga a pudno a magun-od da ti wayawaya manipud iti henosidyo ken okupasyon.