Kidkiddawen ti organisasyon dagiti abugado ken salaknib ti karbengan-tao iti International Criminal Court (ICC) idi Setyembre 29 a patawan ti aksyon a pangdisiplina ti abugado ni Rodrigo Duterte a ni Nicolas Kaufman gapu iti maulit-ulit a panangballikog na ken panangipasaknap ti kamali nga impormasyon kanaig iti kaso ni Duterte. Kabilang kadagiti grupo ti Karapatan, Duterte Panagutin Network ken Rise Up for Life and Rights.

Kunada, binallikog ni Kaufman dagiti aktwal a pasamak ken pablaak tapno maallilaw ti korte. Maysa ditoy ti inwaras na nga immanamong ti prosekusyon, ken uray ti gubyerno ti Pilipinas, iti petisyon para iti interim release wenno temporaryo a pannakaruk-at ni Duterte. Agpada nga inlibak daytoy ti prosekusyon ken ti gubyerno ti Pilipinas.

Mano a lawas sakbay daytoy, inpablaak ti ICC iti publiko ti tallo a napapateg a dokumento a sumupsuporta iti kaso laban ken Duterte: ti Document Containing the Charges (DCC), maysa a listaan ti 181 ebidensya, ken maysa a pre-confirma-tion brief, a napetsaan ti Hulyo 4.

Lalaunen ti DCC ti tallo a bilang ti krimen laban iti sangkataw-an a naisango koma ken Duterte nu natuloy ti kumpirmasyon ti kaso na idi Setyembre 23. Numan pay kurang ken limitado ti naipila a kaso, ibilbilang metten dagiti biktima ti DCC kas “napateg nga addang agturong iti sungsungbatan.”