Tuluy-tuloy ti panagbettak dagiti rali ken demonstrasyon dagiti demokratiko a dasig ken sektor iti nadumaduma a paset ti pagilyan iti napalabas a dua a lawas tapno agtultuloy a kundenaren ti nasaknap a korapsyon ti rehimen Marcos. Pagbatbatayan da ti rali ti ginasut a ribo a Pilipino iti Luneta Park idiay Manila ken kasaruno a martsa idiay Mendiola.

Iti dakkel a protesta idi Setyembre 21, bimtak ti kumprontasyon idiay Mendiola ken Recto. Naalaan ti bidyo ti brutal a panagranget dagiti pulis ken dagiti kabataan, panangpang-ur ti batuta, panangkugtar ken pabalagbag a panagawit kadakwada. Naiyulat met ti panagpaltog ken panagipurwak ti tirgas dagiti pulis.

Saan a nagbuteng dagiti kabataan ken umili iti impakita a kinauyong ken brutalidad ti armado a pwersa ti rehimen Marcos idi naranggas a dupraken daytoy ti protesta ken kumprontasyon. Saan a bumaba iti 277 indibidwal, kabilang ti 91 menor de edad (edad 9 ti kaubingan), ti pinidut dagiti pulis.

Natay ti mangmangged iti konstruksyon a ni Eric Saber a napuntaan ti bala iti tengnged na ti nagpaputok a pulis. Ni Saber ket naggapu iti trabaho na idiay Pasay City, bimmaba idiay Recto Station ken agballasiw tapno aglugan ti dyip idi pinaltogan da isuna manipud iti likod. Naitaray isuna iti ospital ngem natay met laeng idi Setyembre 23. Pimmusay met iti katengngaan ti kumprontasyon ti agtawen 15 a ni Mark Chustin Serbo, kadwa dagiti nagprotesta, a binagsol ti maysa nga agtawen 52 a sibilyan.

Dagiti naaresto ken naibalud ket nakapadas ti kinaulpit dagiti pulis. Karaman kadagitoy ket ubbing ken kabataan, estudyante, mangmangged, dagiti empleyado ti BPO, ken sumagmamano a pinagbabaraan ti pulis gapu laeng ta adda da iti lugar ti rinnupak. Nangrugi laeng a nawayawayaan dagiti naaresto idi Setyembre 25 kalpasan ti napabayag ken naitantan a panagiproseso dagiti pulis ken husgado kadagiti kaso da. Adu kadakwada ket kinasapulan nga agpyansa tapno mawayawayaan manipud iti agtutuon a kaskaso.

Nawayawayaan met dagiti menor-de-edad a napidut ken naaresto ti naibilang a karaman iti riribuk uray awan ti nalawag nga imbestigasyon. Ti sumagmamano kadakwada ket insango pay ni Manila City Mayor Isko Moreno Domagoso iti publiko ken midya a labsing iti karbengan dagiti ubbing ken usto a proseso iti linteg.

Immawag dagiti grupo iti karbengan-tao ti naan-anay ken independyente nga imbestigasyon tapno pagsungbaten ti amin a karaman iti kinaranggas. Kinundenar da met ti “cover-up” kadagiti krimen ti estado laban iti umili.

Agtigtignay ti umili

Agtultuloy a masuksukog ti tignay kontra korapsyon iti porma dagiti walkout, piket-protesta a maaw-awagan a Black Friday Protest ken tignay dagiti sektor ken grupo kadagiti ili. Rinibo ti balbaliw a nagipakita ti pwersa da idiay Metro Manila, Isabela, Bulacan, Pampanga, Laguna, Palawan, Naga City, Davao City, Davao Oriental ken dadduma pay a syudad ken prubinsya.

Kasaruno ti serye ti walkout idi umuna a tallo a lawas ti Setyembre, balbaliw a naimaldit dagiti istorikal a walkout iti Far Eastern University (1,000), University of Sto. Tomas (1,500), De La Salle University-Manila ken College of St. Benilde (1,500), Philippine Normal University (1,000), Isabela State University (500), DLSU-Laguna, UP Visayas (800), Ateneo de Davao University (1,000), Brokenshire College Inc. ken Davao Oriental State University. Pukkaw dagiti kabataan uray kadagiti konsyerto ken paay-ayam: “Ikulong na yan, mga kurakot!”

Nag-walkout met ti ginasut a manursuro ken mangmangged iti edukasyon idi Oktubre 3 kas panangbatikos iti korapsyon ken pananglagip iti World Teachers’ Day.

Idiay Bulacan, a maibilbilang a sentro ti kunniber kadagiti proyekto a flood control, mabukbukel dagiti nalapad a panagkaykaysa ti umili laban iti korapsyon. Nagtignay dagiti Bulakenyo iti 12 syudad ken ili iti prubinsya ken tumaktakder laban kadagiti lokal ken nailyan nga ahensya ti gubyerno a karaman iti korapsyon. Agbukbukel da kadagiti grupo ken alyansa.

Ipakpakita dagiti umir-irteng a protesta ti nauneg a diskuntento dagiti Pilipino iti sango ti krisis iti ekonomya ken pulitika a mangpangpang-ur iti agar-ari a sistema. Manipestasyon daytoy ti nasaknap a sentimyento ti nalawa a masa nga agsagsagaba iti korapsyon ken dagiti kumarkaro a parikut ti malakolonyal ken malapyudal a sistema.