Binukel itay nabiit dagiti Negrosanon ti GMO-Free Negros Coalition, maysa nga asosasyon ti 82 indibidwal ken organisasyon manipud iti sektor ti mannalon, non-governmental organization, tao’t simbaan, estudyante, akademiko, agtagikwa kadagiti hotel ken restawran ken pribado a sektor tapno labanan ti singasing a panagserrek dagiti mula a GMO (genetically-modified organism) iti prubinsya.

Iruprupir da a rumbeng a suruten dagiti ordinansa a mangiparparit iti panagserrek, panagmula, panagpadakkel, panagpadas ken distribusyon ti sibibiag a GMO iti isla.

Idi 2023, nagiyebkas ti interes ti San Miguel Corporation nga agpuonan iti prubinsya para iti pabrika ti chicken feeds ken proyekto a poultry. Tapno matuloy ti proyekto, nagidatag ti singasing nga ordinansa idi Agosto 26 ti lokal a gubyerno tapno mapalubosan ti panagmula dagiti korporasyon ti GMO a mais.

Idi Setyembre 30, nangted ti uppat a position paper ti koalisyon iti sangguniang panlalawigan tapno kariten ti singasing nga ordinansa. Nagisayangkat met ti tignay dagiti kabataan estudyante manipud iti nadumaduma a konseho, organisasyon ken publikasyon idi Setyembre 18 idiay Bacolod City tapno ipeksa ti panagkedked da.

Nagiyebkas met ti nainget a panagsupyat ditoy ti National Democratic Front-Negros. Kuna daytoy, ad-adda nga agrigat dagiti mannalon nu mabaybay-an a sumrek ti GMO iti prubinsya gapu ta mapilitan da nga agsanggir kadagiti imported a bukel ti GMO ken dagiti input a kontrolado ti gangannaet a korporasyon. Napeggad met iti salun-at ti GMO gapu iti epekto daytoy iti bagi kas ti allergy, antibiotic resistance, cancer ken pangmabayagan a pannakaperdi dagiti naguneg ti tao.