Iti maikatlo a gundaway, intantan ti Commission on Elections (Comelec) ti eleksyon a parlamentaryo ti Bangsamoro Autonomous Region in Muslim Mindanao (BARMM) a naituding a maangay koma inton Oktubre 13. Daytoy ket kalpasan nga ideklara ti Korte Suprema a labsing iti konstitusyon ti Bangsamoro Autonomous Act 77 (BAA 77 wenno Redistricting Bill), a nangituding a maiyakar ti pito a pwesto iti parlamento nga orihinal a nakailatang para iti Sulu iti sabali a distrito ti BARMM.

Minandaran ti korte ti Bangsamoro Transition Authority (BTA) nga agaramid ti baro a panagbibingay dagiti distrito ken isumite daytoy iti korte inton Oktubre 30. Inyakar met daytoy ti eleksyon inton agtapos ti Marso 2026. Kaipapanan daytoy ti nasayang a pannakabusbos ti ₱1.2 bilyon a pondo a naaramaten ti Comelec iti panagsagana iti eleksyon.

Tantan-awan ti umili a Moro a ti balbaliw a panangitantan iti eleksyon ket maysa manen a pannakapaay tapno maipatungpal ti pudno nga awtonomiya iti teritoryo da. Sakbay pay a nairuar ti desisyon, sinupyat dan ti panangpasardeng ti Comelec iti panagsagana iti bileg ti temporary restraining order ti Korte Suprema laban iti BAA 77. Kunada, ti eleksyon ket saan laeng a pakaseknan iti panagbotos. Napatpateg pay, daytoy ket panangrespeto iti awtonomiya, panangrespeto kadagiti katulagan iti kapya ken panangpasingked iti karbengan para iti bukod-a-pangngeddeng ti umili a Moro.