Naipatungpal idiay Gaza manipud Oktubre 14 ti maysa a ceasefire iti baet ti Zionista nga estado ti Israel ken grupo a Hamas nga inballaet ti US. Kaniwas iti ilaslastog ti presidente ti US a ni Donald Trump, daytoy ket saan a “regalo a diplomatiko,” nu di ket resulta ti saan a magungon a pangngeddeng ti umili a Palestino a nagkedked nga isuko ti pagilyan da. Ginasut a ribo a Palestino ti magmagnan nga agsubli idiay Gaza City tapno inut-inot a subboten ti biag da a dinadael ti henosidyo ti Israel.

Iti laksid ti katulagan, tuloy-tuloy dagiti panaglabsing ti Israel kadagiti karbengan ti Palestino. Adda iti 97 ti pinatay dagiti pwersa daytoy manipud Oktubre 14 agingga Oktubre 19. Idi Oktubre 19, kellaat nga insardeng ti Israel ti panagserrek ti ginasut a trak nga agip-ipan ti taraon iti uneg ti Gaza.

Iti paset ti Hamas, tinungpal daytoyen ti probisyon ti panangwayawaya iti amin a 20 a nabatbati nga iggem na a sibibiag a balud. Rinugyan met daytoyen nga iyakar ti kustodiya ti 23 a bangkay dagiti balud a napasag gapu iti awan sarday a panagatake ti Israel.

Idi Oktubre 7 ken dagiti aldaw kalpasan daytoy, sinubliyan ti minilyon nga umili iti intero a lubong ti maikadwa a tawen ti Al Aqsa Flood tapno suportaran ti nainkalintegan a panaglaban dagiti Palestino ken kundenaren ti henosidyo. Napasamak dagiti higante a tignay idiay UK, The Netherlands, Spain, Italy, US, Canada ken Japan. Adda met dagiti tignay iti Pilipinas, kabilang ti protesta dagiti grupo a nailyan-demokratiko laban iti panagaramat ti Israel iti taraon ken ayuda kas armas. Idi Oktubre 17, napasamak ti kampuhan dagiti estudyante para iti Palestine iti uneg ti Ateneo de Manila University.

Iti tantya dagiti syentista ken eksperto, 680,000 ti kabuklan a pimmusayen idiay Palestine nu sadinno a 380,000 ket maladaga ken dagiti ubbing nga agtawen 5 agpababa. Ti nasurok 68,000 kadakwada ket direkta a napatay dagiti bomba ken bala dagiti soldado nga Israeli.

Nakaimaldit met dagiti internasyunal nga ahensya ti 400 a pannakatay gapu iti nakaro a bisin, kabilang ti 140 nga ubbing. Kabayatanna, adda iti 3,000 ti napasag bayat nga agur-uray wenno makiin-innagaw ti ayuda ken taraon, nga adu kadagiti “death trap” ti Gaza Humanitarian Foundation a patpatarayen dagiti soldado nga Amerikano ken Israeli.