Aksyon kontra demolisyon idiay Marikina. Nalapdan dagiti residente ti Agora, Barangay Sto. Niño, Marikina City ti plano a demolisyon iti komunidad da idi Oktubre 15. Nagitakder da ti kampuhan idi Oktubre 14. Nasurok 53 a nakurapay a pamilya ti adda iti peggad a mapatalaw iti komunidad iti laksid ti nasuroken 40 tawen a panagindeg da iti lugar. Gapu iti protesta, nagkari ti lokal a gubyerno ti relokasyon para kadagiti apektado a residente.

Barikada idiay Benguet. Dumanon iti 400 a residente ti dua a barangay idiay Mankayan, Benguet ti nagbarikada idi Oktubre 13 laban iti panagbasak ti Crescent Mining and Development Corporation iti ansestral a daga da. Ti barikada ket nagserbi met a pormal a panangbuangay ti alyansa a No Mines Movement of Guinaoang and Bulalacao.

Tignay kontra-minas idiay Dupax del Norte, NV. Manipud Setyembre 17 ket nagitakder ti barikada dagiti residente ti Barangay Bitnong, Dupax del Norte idiay Nueva Vizcaya laban iti Woggle Corporation. Kimmaro ti risiris dagiti residente ken kumpanya idi nagiparuk-at ti maysa a korte iti prubinsya ti Temporary Restraining Order idi Oktubre 14 laban iti barikada. Dinuprak dagiti pulis ti barikada idi Oktubre 16 ken inaresto da ti tallo a residente. Dagus da met laeng a nawayawayaan.

Agsusumbangir a kinundenar dagiti residente, simbaan, grupo ken indibidwal ti panagranggas dagiti pulis. Nagiruswat da ti karaban ken protesta iti Nueva Viscaya Provincial Capitol idi Oktubre 20 tapno kundenaren ti kinaawan aksyon ti lokal a gubyerno. Nagisayangkat met ti tignay iti pareho nga aldaw ti grupo a Kalikasan PNE iti batog ti Department of Environment and Natural Resources.

Naituding met a nga agisayangkat ti protesta iti Oktubre 21 ti Anakbayan United Kingdom ken dadduma pay a nailyan demokratiko nga organisasyon idiay UK iti upisina ti Metals Exploration PLC Office idiay London tapno kundenaren ti panaggamrud iti kalikasan ti kumpanya.