Agtultuloy a gungungonen ti krisis iti pulitika ti reaksyunaryo nga estado a patpatarayen dagiti burukrata-kapitalista. Saan a masebseban ti panaggayebgeb ti pungtot ti masa iti maibunbunannag nga umad-adu a kaso ti korapsyon. Saan nga agsarday ti tignay a walkout dagiti estudyante, nu di ket agramramaram pay kadagiti unibersidad iti Manila ken dadduma pay a paset ti pagilyan. Sumaksaknap ti tignay dagiti grupo a sibiko, tao’t simbaan, mangmangged, nakurapay ken dadduma pay a sektor.

Nalalawa nga alyansa ti umili ti maipatpatakder a desidido a gun-oden ti hustisya para iti umili a biktima ti kriminal a korapsyon. Bimmangonen ti maysa a nalapad ken nabileg a tignay ti umili a mangdayyeg iti rehimen US-Marcos ken manggibus iti panagari dagiti burukrata-kapitalista a bunggoy nga adda iti poder.

Agindadalus ken agar-arte ni Marcos a makigkigtot wenno agung-unget kadagiti agtatakaw. Para iti umili ket awan ti mamaay ti sikreto nga imbestigasyon ti binukel na nga “independent commission” a nalawag nga awan sabali a panggep na nu saan a kaluban ti kinapudno ti binilyon a piso a porsyento iti naanomalya a kontrata ti umul-uli iti Malacañang, ken mismo a ni Marcos ti ari ken adda iti tuktok ti bantay ti basura ti korapsyon. Tallo a bulan kalpasan nga ideklara na a “mahiya naman kayo,” nalawag iti mata iti umili a ni Marcos mismo ti numero uno nga awan-bain ken kakarwan a garapal iti panagibulsa ti binilyon a piso a pondo ti umili.

Pilit met a saksakyan ti bunggoy a Duterte ti nalawa a protesta ti umili, ngem nakabasbassit laeng ti maal-allilaw da. Saan da a makaluban ti bukod a krimen ken panagtakaw, nangruna idi nakatugaw ti dati a presidente Rodrigo Duterte. Balbaliw a mauk-ukag ti binilyon nga imbulsa dagiti Duterte iti kontrata iti Pharmally idi panawen ti pandemya, ₱51 bilyon a flood control project ni Paolo Duterte ken ₱125 milyon a confidential and intelligence fund ni Sara Duterte. Binilyon a piso a kontrata met ti napan iti alalay idi ni Duterte a ni Bong Go ken dadduma pay nga alyado da.

Iti sango ti sumaksaknap a damdamag tapno sukatan ti agar-ari a rehimen, inpamatmat ti imperyalismo a US a natibker a supsuportaran daytoy ti aso-aso na a ni Marcos. Itay nabiit, personal a binisita ti maysa nga upisyal ti embahada ti US ti panagdengngeg iti ICI kas pammaneknek iti suporta daytoy.

Agngarngaryet ti umili nga iti laksid ti nakaro a pungtot iti korapsyon, sangon-sango nga inulit ni Marcos ken dagiti kakunsabos na iti konggreso ti panagisingit ti nadumaduma a pork barrel iti badyet iti 2026. Pilit nga inserrek ni Marcos ti ₱281 bilyon a pork barrel iti langa ti unprogrammed appropriations, confidential and intelligence funds ken dadduma pay. Adda ti ₱414 bilyon met ti pork barrel a pagbibingayan dagiti kunniber a konggresista ken senador.

Agtultuloy a maibutbutaktak nu kasano nga ti amin a programa ti gubyerno ket natatek ti korapsyon. Malaksid kadagiti proyekto a flood control, binilyon a piso met ti mataktakaw kadagiti farm-to-market road, multipurpose building, health center, rangtay, kasta met iti pangpubliko a pondo para iti ayuda, sweldo, pensyon ken seguro.

Ammo la unay ti umili nu anya ken sadinno dagitoy a proyekto a kinurakot dagiti korap nga upisyal ti gubyerno ken militarb ken dagiti kasabwat da a dadakkel a negosyante. Iti panagtitinnulong ti nadumaduma a sektor, dagitoy ket rumbeng a sukainan, idokumento, ibunannag ken itungpa kadagiti kriminal a burukrata-kapitalista.

Saan a rumbeng a sardengan dagiti Pilipino ti panagsingir ken panagpasungbat kadagiti burukrata kadagiti tignay ken protesta da. Kabinnadang dagiti kabataan, kasapulan nga ad-adda pay a papigsaen ti masa a nakurapay nga anakling-et ken dagiti mangmangged ti boses da laban iti korapsyon, burukrata kapitalismo ken pasismo, ken tapno paawengen ti pukkaw para iti panaggibus ti parigat a rehimen US-Maros ken panagari-ari ti bunggoy a Duterte.

Kasaknapan pay dagitoy kadagiti nakurapay a komunidad ken pabrika, nu sadinno a kaadwan ken kakarwan nga aglukluksaw ti masa nga anakling-et a biktima ti korapsyon ken panagkukunsabos dagiti burukrata-kapitalista ken dadakkel a negosyante. Malaksid iti pakaseknan ti panaglayus kadagiti komunidad a bunga ti korapsyon ken palpak a gubyerno, rumbeng a palataken ti pakaseknan ti nababa a sweldo, nasaknap a disempleyo ti kabataan, nangato a presyo dagiti gagatangen, nangato a gastos iti edukasyon, awan-sarday a panagngato ti gasolina, bulok a serbisyo a panggimong ken dadduma pay a bunga ti sabwatan dagiti korap a burukrata-kapitalista ken sarabusab iti ganansya a dadakkel a burgesya.

Palawaen pay ti tignay protesta laban iti korapsyon iti kaadwan a prubinsya, kadagiti ili ken syudad. Minilyon ti biktima ti palpak ken saan a maaramat nga imprastruktura a nagbusbosan ti kwarta ti umili. Tipunen ti rurod da kadagiti trahedya a mapadpadasan da tunggal adda ti didigra ti bagyo, gingined wenno simple a panagtudo. Pagsungbaten dagiti burukrata-kapitalista iti krimen da nga ituntunda ti pannakalned iti layus dagiti sibubukel a komunidad ken dagiti kataltalonan, pannakaduprak dagiti rangtay, pannakadadael dagiti kalsada, pannakarebba dagiti pasdek ken pagtaengan ken dadduma pay. Nairut ti silpo iti burukrata kapitalismo ti pannakalugi dagiti mannalon, nababa a sweldo dagiti mangmangged, panagtennag ti sapul dagiti drayber, panagsuwek ti pagbiagan dagiti nakurapay, pannakapukaw ti pagtaengan, pannakalmes iti utang, dislokasyon ken panagpatalaw manipud iti daga ken adu pay a rupa ti kinakurapay.

Rumbeng nga itipon dagiti estudyante a kabataan ken dadduma pay a sektor a tumaktakder laban iti korapsyon ti intar da iti pigsa ti masa nga anakling-et iti kasyudadan ken kaaw-awayan. Nu adda man palalo a kabutbuteng ni Marcos a mangdayyeg ti panagari na, dayta ket ti aggigiddan a walkout kadagiti eskwelaan, panag-aklas dagiti mangmangged, martsa dagiti mannalon, welga dagiti empleyado ti gubyerno, manursuro ken akademiko, tigil-pasada iti pangpubliko a transportasyon ken dadduma pay nga sangsangkamaysa a tignay ti umili.

Natibker nga umab-abante ti agdaldalluyon a tignay protesta ti umili laban iti korapsyon ken burukrata kapitalismo gapu iti panangiyuna dagiti nailyan-demokratiko nga organisasyon ken alyansa. Isuda ti kaanepan iti panangdanon ken panangriing iti masa. Isuda ti kapipingetan a buklen ti kalapadan a panagkaykaysa ti umili laban iti rehimen US-Marcos.

Bayat a nga agdaldaluyon ti tignay protesta, kasapulan nga igiddan dagiti nailyan-demokratiko a pwersa ti naregta a tignay panagadal iti gimong ken rebolusyon a Pilipino iti intar ti masa. Nasken nga saan a mauma nga ipalawag a ti korapsyon ken kunniber ket natural iti malakolonyal ken malapyudal a sistema, a magibusan laeng iti panangibagsak iti imperyalismo, pyudalismo ken burukrata kapitalismo.

Ti tarigagay ti umili a panagbaliw ti sistema ket magun-od laeng iti panagabante ti demokratiko a rebolusyon ti umili babaen ti armado a dangadang. Isu a rumbeng nga ibangon ti kaadwan a balangay dagiti organisasyon ti National Democratic Front iti intar da ken sipipinget a suportaran ken papigsaen ti New People’s Army. Kasapulan a paunegen ken palawaen ti panagramut ti Partido iti intar ti masa tapno agserbi a bugas ken tarabay iti naunday a dangadang da.