Nagisayangkat ti makalawas a protesta dagiti organisasyon ti nadumaduma a sektor kas pananglagip iti bulan dagiti pesante. Tapno itampok ti panawagan dagiti mannalon, intakder da ti maysa a kampuhan iti sango ti Department of Agrarian Reform Central Office idiay Quezon City manipud Oktubre 15 agingga 21. Naisayangkat iti kampuhan ti panagbisita, pannakikaykaysa ken innadal karaman ti nadumaduma a sektor. Naangay dagiti workshop, medical mission ken panangipaay ti materyal a suporta kadagiti mannalon.

Malaksid ditoy, maysa met a rali ti inyuna ti Amihan idi Oktubre 15 tapno lagipen ti Sangalubongan nga Aldaw ti Babbai a Mannalon. Idi Oktubre 16, nagmartsa manen dagiti grupo iti Quezon City iti panangiyuna dagiti mannalon manipud iti isla ti Negros para iti Sangalubongan nga Aldaw ti Panagbisin. Kabigatanna, nagprotesta da iti hedkwarters ti Armed Forces of the Philippines idiay Quezon City tapno kundenaren ti militarisasyon iti kaaw-awayan. Maysa a rabii ti pabuya ti insayangkat da ken dagiti grupo ti artista idi Oktubre 19 idiay UP Diliman. Nagprotesta da met iti Department of Social Welfare and Development idi Oktubre 20 tapno irupir ti kumpensasyon para iti danyos a gubway ti didigra.

Agalimpatok ti protesta dagiti mannalon iti Oktubre 21, anibersaryo ti bogus a reporma iti daga ti Presidential Decree No. 27 ni Marcos Sr. Agtignay da a kadwa ti dadduma pay a sektor idiay Liwasang Bonifacio laban iti korapsyon ti rehimen Marcos ken bunggoy a Duterte. Ipanawagan da ti panangpadisi iti poder ti dua a dadaulo a kurakot.