Iti sango ti kumarkaro a pasismo ti rehimen Marcos, ad-adda a bumarbara ti rebolusyonaryo a determinasyon dagiti manursuro, duktor, nars, siyentista, inhinyero ken dadduma pay a propesyunal a pumaset ken sumuporta iti gubat ti umili. Tuluy-tuloy a pappapigsaen da dagiti rebolusyonaryo nga organisasyon da tapno agserbi a bubon ti suporta ken baro a mannakigubat ti New People’s Army (NPA).

Iti inspirasyon ti tignay panagilinteg ti Partido, balbaliw a napapigsa ti Katipunan ng mga Gurong Makabayan (Kaguma), Makabayang Samahang Pangkalusugan (MSP) ken Liga ng Agham para sa Bayan (LAB). Dagitoy a timpuyog ket naregta nga agiyeb-ebkas kadagiti napupudot a pakaseknan ti umili. Regular wenno masansan nga iruruar da dagiti rebolusyonaryo a pangmasa a pagiwarnak da: Ang Rebolusyonaryong Lunas ken Dagling Lunas (MSP), Liyab (Kaguma) ken Agham Bayan (LAB).

Dagiti patriyotiko a manursuro

Idi Enero, naitakder ti Kaguma ti maysa a baro a balangay iti maysa nga unibersidad. Kabilang iti napili nga upisyal ti balangay ti baro a kameng daytoy a ni Ka Amber a narekrut idi maudi a paset ti 2024. “Agar-arikapak pay laeng tatta ngem kaanoman ket saan ko a narikna nga agkurangak uray kabarbaro ak pay gapu iti nasayaat a pannakilangen ken panagtulong dagiti kakadwa,” segun ken Ka Amber.

Iti sango ti adu a trabaho ken dagiti personal a sangsangwen iti biag, ikagkagumaan na a tuloy-tuloy a makaakem iti rebbengen na kas upisyal ti balangay. Kunana, maar-aramid na daytoy iti panagkapet kadagiti prinsipyo ken panagsungbat iti saludsod nga “apay” ken “para siasino.”

Segun iti Kaguma, kasapulan a papigsaen ti bagbagi daytoy tapno direkta a makipaset iti armado a dangadang, mangibingay iti NPA ken tumulong iti panagorganisa iti kaaw-awayan para iti panagpanday ti rebolusyonaryo a panagkaykaysa ken dangadang ti umili.

Panangagas iti krisis ti kagimongan

Iti maysa a larangan gerilya iti Luzon, simrek ti maysa a pangkat ti MSP a bukbuklen dagiti duktor, propesyunal ken estudyante iti salun-at tapno agiyaramid ti maysa a misyon medikal para iti masa ken hukbo. “Iti panagserrek iti sona, saan a nalaka ti naglasatan ken napadasan mi nangruna ta kapatur ti napigsa a panagtudtudo,” panangibingay ti maysa a duktor.

Intakder da ti maysa a klinik nu sadinno nga inangay da ti konsultasyon kadagiti pasyente ken paandaren ti bassit a laboratoryo. Tinaming ti MSP dagiti simple agingga kadagiti kumplikado a sagubanit a pisikal ken mental dagiti Nalabbaga a mannakigubat.

Iti uneg ti hukbo, napadasan da ti simple a biag, dagiti sakripisyo iti panangiyabante ti gubat ti umili ken ti nabara a panangawat ti masa a mannalon kadakwada. “Dagitoy a kapadasak ti ad-adda a mangpatibker ken mangpabara iti rebolusyonaryo a pangngeddeng ko,” istorya pay ti duktor.

Kabayatanna, nagisayangkat ti asembliya dagiti estudyante iti salun-at manipud iti nadumaduma nga unibersidad tapno itakder ti maysa a balangay ti MSP idi Agosto 2. Dakkel nga addang daytoy para iti panangpaarakup ti MSP kadagiti estudyante iti demokratiko a rebolusyon ti umili.

Dagiti siyentista para iti DRU

Innem a bulan ti programa para iti tour-of-duty (TOD) iti NPA ni Ka Langga, kameng ti LAB ken maysa a dati nga estudyante ti kurso a computer engineering iti maysa a pribado nga unibersidad. Iti daytoy a panawen, limmatak ti pagayatan na a sibubukel a panawen nga agserbi iti kaaw-awayan. “Idi nag-TOD ak, ad-adda a napatibker ti pangngeddeng ko nga agpultaym gapu ta naan-anay a nakitak daytoyen ken napaneknekak ti kinausto ken pagkasapulan nga agserbi kas mannakigubat,” kunana.

Nakita na mismo ti nabara a panangsarabo ken panagayat ti masa iti hukbo ti umili iti larangan a matigtignayan. “Isuda pay laeng a kakarwan a magungundawayan ti makaaramid a mangpakan iti hukbo ken tumultulong iti panagala ti suplay para iti panagtalinaed da ken makipaspaset kadagiti rebolusyonaryo a trabaho,” istorya na.

Iti kaaw-awayan, agtultuloy met a panpandayen ti LAB dagiti aktibista ken kadre daytoy kas pultaym nga organisador iti sektor. Pamuspusan met daytoy tapno ingato ti kamulatan ken kinasagana dagiti kameng da a dalyasaten ti dana ti armado a dangadang kas ken Ka Langga.

Naadaw iti Liyab, Ang Rebolusyonaryong Lunas ken Agham Bayan.