Iginpatuman ha Gaza tikang Oktubre 14 an usa nga ukoy-bubto ha giutan han Zionista nga estado han Israel ngan grupo nga Hamas pinaagi han US. Sukwahi ha iginhihinambog han presidente han US nga hi Donald Trump, diri ini usa nga “diplomatiko nga regalo,” kundi resulta han diri nababantad nga panindugan han katawhan Palestino nga dumiri nga igsurender an ira nasud. Gatos kayukot nga Palestino na an nagbabaktas tipabalik han Gaza City agud hinay-hinay nga bawion an kinabuhi nira nga ginlasurbo han henosidyo han Israel.

Ha luyo han kasarabutan, dirudiretso an mga pagtalapas han Israel ha mga katungod han Palestino. Aada ha 97 an ginpatay han mga pwersa hini tikang Oktubre 14 tubtub Oktubre 19. Hadton Oktubre 19, tigda nga gin-undang han Israel an pagpasulod han gatus-gatos nga trak nga nagdadara han pagkaon ha sakob han Gaza.

Ha parte han Hamas, gintuman na hini an probisyon han pagpapagawas ha tanan nga 20 nga nasasalin nga katin hini nga buhi nga bihag. Gintikangan na liwat hini nga ibalhin an kustodiya han 23 nga lawas han mga dakop nga napatay tungod ha waray wantas nga pangangatake han Israel.

Hadton Oktubre 7 ngan mga adlaw kahuman hini, ginhandum han milyun-milyon nga katawhan ha bug-os nga kalibutan an ikaduha katuig han Al Aqsa Flood agud suportahan an makatadungan nga pag-ato han mga Palestino ngan kundenahon an henosidyo. Nagkamayda han dako nga paggios ha UK, The Netherlands, Spain, Italy, US, Canada ngan Japan. Nagkamayda liwat han mga paggios ha Pilipinas, kalakip an protesta han mga grupo nga nasyunal-demokratiko kontra ha paggamit han Israel ha pagkaon ngan ayuda komo armas. Hadton Oktubre 17, nagkamayda han kampuhan para ha Palestine an mga estudyante ha sakob han kampus han Ateneo de Manila University.

Ha pagtantiya han mga siyentista ngan eksperto, 680,000 na an kabug-usan nga napatay ha Palestine, kun diin 380,000 mga puya ngan mga kabataan nga edad 5 tipaubos. An sobra 68,000 ha ira direkta nga napatay han mga bomba ngan bala han mga sundalo nga Israeli.

Nakaglista naman an mga internasyunal nga ahensya han 400 nga pagkamatay tungod ha grabe nga gutom, kaupod an 140 nga bata. Samtang, aada ha 3,000 an napatay samtang naghuhulat o nakikig-agaway han ayuda nga pagkaon, damo ha mga “death trap” (lit-ag) han Gaza Humanitarian Foundation nga ginpapadalagan han mga sundalo nga Amerikano ngan Israeli.