Manipud Setyembre, innem a lugan a pangbaybay a naggapu kano idiay Venezuela ti pinabettak ti US iti Carribean Sea iti akusasyon nga aglalaon dagitoy kadagiti “narko-terorista” ken agibibyahe ti iligal a droga. Naiyaramid dagiti panagpabettak kas paset ti baro a serye ti agresyon a militar iti Venezuela nga awanan basaran nga ak-akusaran ti presidente ti US a ni Donald Trump a sumupsuporta kadagiti “narko-terorista.” Dumanunen iti 27 ti ekstra-hudisyal a pinatay ti US kadagitoy a panagatake.

Kagiddan dagiti panagpabettak, pinairteng ti US ti presensya a militar ti US iti Carribean Sea babaen ti panangipatulod kadagiti warship, maysa a nuclear-powered submarine, ken dadduma pay a lugan a panggubat. Agipatpatayab met daytoy kadagiti helikopter, fighter jet ken dagiti B-52 bomber iti internasyunal a tangatang asideg iti Venezuela.

Minandaran met ni Trump ti Central Intelligence Agency nga agisayangkat kadagiti sikreto nga operasyon iti uneg ti Venezuela laban iti gubyerno ken umili daytoy. Umannurot daytoy iti anunsyo ni Trump nga iyaramid ti ad-adda pay nga aksyon militar laban iti Venezuela ken iskema a panagsukat ti rehimen iti soberano a pagilyan. Nagipataw pay ni Trump ti $50 milyon a premyo para iti panang-aresto iti presidente ti Venezuela a ni Nicolas Maduro. Nayon dagitoy kadagiti agrarairan a sangsyon iti ekonomya a nabayagen nga inpataw ti US ken dagiti alyado daytoy iti Venezuela.

Kakumplot ti imperyalismo a US dagiti maka-Kannawan a grupo iti uneg ti Venezuela iti kampanya nga agresyon. Idi umuna a lawas ti Oktubre, inbunannag ti gubyerno ni Maduro ti panaggandat dagitoy a grupo nga agiyaramid ti maysa nga operasyon a “false flag” nu sadinno nga agimula ken agpabettak daytoy ti bomba iti embahada ti US idiay Caracas, kabisera ti Venezuela, tapno ad-adda pay a pabaraen ti tensyon.

Numanpay nakarikep ti embahada manipud idi naisardeng ti diplomatiko a relasyon ti Venezuela ken US idi pay 2019, adda dagiti empleyado ken pwersa iti seguridad nga agtaltalinaed iti pasdek. Kasaruno daytoy a damag, inpasardeng ni Trump ti anyaman nga addang ti gubyerno na a makisarita ken makiareglo iti Venezuela.

Saan a nagpatukay ti Venezuela ken ti gubyerno ni Maduro kadagiti panagatake ken panagpangta ni Trump. Segun ken Maduro, “saan danto pulos a makastrek iti Venezuela” ken nakasagana a salakniban ti militar ken umili a Venezuelan ti pagilyan ken soberanya da.

Sangalubongan a suporta iti Venezuela

Nasaknap a sinidir dagiti grupo iti sangalubongan ti agresyon ti US ken ni Trump iti Venezuela. Immawag ti International League of Peoples’ Struggle (ILPS) a labanan ti panaggandat a sukatan ti gubyerno ti Venezuela ken ti amin a porma ti hybrid a pannakigubat a kimmaro iti panawen ni Trump.

Awan sarday ti agresyon ti US iti gubyerno ti Venezuela manipud idi timmakder daytoy laban kadagiti imperyalista a diktar daytoy. “Awan sarday ti panaggandat ti US a tennagen ti demokratiko a nabotosan a gubyerno ti Venezuela ken determinado daytoy nga igupen ti pastrek manipud iti langis ti pagilyan tapno pabaknangen dagiti monopolyo kapitalista ken dagiti agpupuonan,” segun iti ILPS.

Pablaak ti grupo, ti agresyon ti US ket mangidurduron laeng iti uma-adu nga umili iti sangalubongan a suportaran ti Venezuela ken ti nainkalintegan a dangadang da para iti nailyan a soberanya laban iti imperyalismo a US.

Iti Pilipinas, idadauluan ti Philippine-Bolivarian Venezuela Friendship Association ken Bagong Alyansang Makabayan ti panagsuporta iti gubyerno ken umili ti Venezuela. Nairut da a makisilsilpo ken Chargé d’Affaires Richard Espinoza Lobo ti Bolivarian Republic of Venezuela Embassy para iti nadumaduma nga aktibidad ken taripnong.

Karaman ditoyen ti pannakimiting da kadagiti mangibagi ti Makabayan Bloc iti House of Representatives idi Oktubre 13. Nabukel ditoy ti plano a panagisumite ti Makabayan Bloc ti maysa a resolusyon iti Konggreso tapno babalawen ti militarismo ti US ken suportaran ti dangadang ti umili a Pilipino para iti kapya, nailyan a soberanya ken karbengan iti bukod a pangngeddeng ti amin a pagilyan.