Gipatuman sa Gaza gikan Oktubre 14 ang usa ka hunong-buto tali sa Zionistang estado sa Israel ug sa grupong Hamas nga gipatung-an sa US. Sukwahi sa gipanghinambog sa presidente sa US nga si Donald Trump, kini dili usa ka “regalong diplomatiko,” kundili resulta sa dili mapukan nga baruganan sa katawhang Palestino nga nagdumili sa pagsurender sa ilang nasud. Gatusan kalibong Palestino na ang nagbaktas pabalik sa Gaza City aron hinay-hinay nga ipabarog ang ilang kinabuhi nga gigun-ob sa henosidyo sa Israel.

Taliwala sa kasabutan, padayon ang mga paglapas sa Israel sa mga katungod sa Palestino. Mokabat sa 97 ang gipatay sa mga pwersa niini gikan Oktubre 14 hangtud Oktubre 19. Niadtong Oktubre 19, kalit nga gihunong sa Israel ang pagpasulod sa gatusan ka trak nga nagdala og pagkaon sulod sa Gaza.

Sa pikas tampi, gituman sa Hamas ang probisyon sa paglingkawas sa tanang 20 ka nahabiling buhi bihag. Gisugdan na usab niini ang pagbalhin sa kustodiya sa 23 ka patayng lawas sa mga bihag nga namatay tungod sa paturagas nga pag-atake sa Israel.

Niadtong Oktubre 7 ug mga adlaw human niini, gihandum sa milyun-milyong katawhan sa tibuok kalibutan ang ikaduhang tuig sa Al Aqsa Flood aron suportahan ang makatarunganong pagsukol sa mga Palestino ug makmakon ang henosidyo. Nahitabo ang dagkung mga protesta sa UK, The Netherlands, Spain, Italy, US, Canada ug Japan. Aduna usay mga protesta sa Pilipinas, lakip ang protesta sa mga grupong nasudnon-demokratiko batok sa paggamit sa Israel sa pagkaon ug ayuda isip armas. Niadtong Oktubre 17, naglunsad og kampuhan para sa Palestine ang mga estudyante sulod sa kampus sa Ateneo de Manila University.

Sumala sa mga siyentista ug eksperto, mokabat na sa 680,000 ang kinatibuk-ang napatay sa Palestine, diin 380,000 mga puya ug mga bata nga edad 5 paubos. Ang kapin 68,000 niini direktang gipatay sa mga bomba ug bala sa mga sundalong Israeli.

Nakatala usab ang mga internasyunal nga ahensya og 400 ka namatay tungod sa grabeng kagutom, lakip ang 140 ka bata. Samtang, mokabat sa 3,000 ang napatay samtang nagpaabot o nagkig-ilogay og ayuda ug pagkaon, daghan sa mga “death trap” sa Gaza Humanitarian Foundation nga gidumalahan sa mga sundalong Amerikano ug Israeli.