Riniribuk ket binutbuteng dagiti elemento ti Armed Forces of the Philippines dagiti delegado ti International Solidary Mission (ISM) a nagisayangkat ti imbestigasyon ken panagadal manipud Oktubre 11 agingga 14. Adda iti Pilipinas ti delegasyon tapno amwen ti mapadpadasan a krisis iti klima, panaggamrud iti kalikasan ken militarisayon iti komunidad dagiti mannalon ken katutubo idiay Rizal, ken kadagiti isla ti Mindoro, Samar, Leyte ken Negros.

Naparang a tiniktikan ken inalaan ti ladawan dagiti soldado dagiti nakaangayan ti aktibidad ti ISM. Innala da ti nagan, sinurot ken pinaliiw dagiti armado agingga kadagiti pagdagdagusan da dagiti delegado. Mano a daras met a nagpatayab dagiti militar ti drone iti rabaw dagiti kampuhan a nakaaramidan dagiti imbestigasyon.

Idi Oktubre 14, napilitan dagiti delegado a leppasen a nasapsapa ti aktibidad da idiay Mindoro gapu iti panagsangpet ti pinullo a pulis ken soldado a nagawit ti atitiddog a paltog iti kampuhan. Nangitunda daytoy ti nakaro a buteng kadagti katutubo ken delegado. Idiay Rizal, agdadata a naparitan da nga agiyaramid ti aktibidad gapu ta awan ti “permit” da. Idi pimmanaw dagiti bimmisita a delegado, tuloy-tuloy a riniribuk dagiti soldado dagiti katutubo a Mangyan idiay Mindoro ken Dumagat idiay Rizal.

Segun iti katutubo a Dumagat idiay Tanay, Rizal, simmansan ti presensya ti militar iti komunidad ken kalpasan ti ISM ket nagpaawag da kadagiti residente para iti interogasyon. Idiay Abra de Ilog, Occidental Mindoro, agtultuloy ti panaglipit dagiti soldado iti komunidad a makaap-apektar iti panagsapul dagiti residente ken mangituntunda ti bisin kadagiti mannalon.

Kagiddan ti panaglipit iti ISM, awan-sarday met ti panagabuso ti militar iti dadduma pay a paset ti pagilyan.

Pasista nga atake idiay Negros. Awan sarday ti pasista a panagatake dagiti soldado iti isla iti napalabas a bulan. Naimaldit ti agtutuon a kaso ti panaglabsing iti karbengan-tao iti kangitingitan dagiti operasyon kombat da iti adu a barangay.

Kaudyan kadagitoy ti panagpaltog ti 79th IB a nakasugatan ti mannalon a ni Kato Rizal ken iti menor-de-edad a kaanakan na bayat nga agal-ala da ti diro idiay Sitio Nabaisan, Barangay Minapasok, Calatrava, Negros Occidental idi Oktubre 17 ti bigat. Iti maudi nga ulat ket saan pay a natunton ti ayan ti menor-de-edad.

Idi Oktubre 7, rinansak ti 94th IB ti balay ti maysa a mannalon idiay Sityo Manluki iti Barangay Carabalan. Maysa a mannalon met ti dinukot ti 94th IB idiay Barangay Buenavista ken pwersado a pinaggiya da iti operasyon kombat. Idiay Toboso, pwersado a sinerrek ken rinansak ti 79th IB ti balay ti dua a mannalon idi Oktubre 11. Idiay Negros Oriental, naiyulat met ti panagtakaw ken panagkampo ti 62nd IB kadagiti sentro ti komunidad, simbaan ken eskwelahan.

Panaglabsing iti IHL. Parparigaten ken liplipiten ti 703rd IBde ti pamilya ken dagiti grupo iti karbengan tao iti panangbawi iti bangkay ti maysa a dakdakamaten da a Nalabbaga a mannakigubat a napatay iti labanan ti militar ken NPA idiay Norzagaray, Bulacan idi Oktubre 17. Kinundenar dagiti grupo iti karbengan-tao ti panagkedked ti militar nga ited iti pamilya ti bangkay ken ti militarisasyon iti punerarya a nakaimassayagan daytoy. Agduduma met ti istorya ti militar kanaig iti napasamak a labanan ken ti panangitulod iti bangkay.

Idiay North Caloocan, kimmaro ti militarisasyon ti NTF-Elcac ken ti 12th Civil Military Operation kadagiti barangay manipud idi Oktubre 6. Sinakop ti militar ti Barangay 175, 181-182 Pangarap Village ken Barangay 187-188. Isaysayangkat daytoy ti kampanya ti Red-tagging ken panaglipit kadagiti kameng ti progresibo a grupo.

Pammapatay. Brutal a pinatay ti lallaki a nakalugan iti motorsiklo ni Niruh Kyle Antatico idi Oktubre 10 idiay Barangay Patag, Cagayan de Oro City. Ni Antatico ket dati a senior legal researcher iti National Irrigation Administration Region 10 a madakdakamat a nangibunannag iti nakaad-adu a kunniber ken anomalya iti uneg ti ahensya kabilang ti mapukpukaw a pondo, substandard a proyekto ken dagiti peke a kontrata. Immawag ti hustisya ti Nafeda-Courage para ken Antatico.