Ha atubangan han tikagrabe nga pasismo han rehimen Marcos, dugang nga naglalarab an rebolusyunaryo nga determinasyon han mga magturutdo, doktor, nars, siyentista, inhinyero ngan iba pa nga propesyunal nga napartisipar ngan nasuporta ha gerra han katawhan. Dirudiretso na nira nga ginpapakusog an kada tagsa nira nga mga rebolusyunaryo nga organisasyon agud magserbe nga atabay han suporta ngan bag-o nga mga mangaraway han Bagong Hukbong Bayan.

Ha inspirasyon han kagiusan pagtutul-id han Partido, utro nga ginpakusog an Katipunan ng mga Gurong Makabayan (Kaguma), Makabayang Samahang Pangkalusugan (MSP) ngan Liga ng Agham para sa Bayan (LAB). Marayhak nga namamahayag ini nga mga asosasyon ha magpaso nga isyu han nasud. Regular o agsub nira nga igin-gagawas an ira mga rebolusyunaryo nga panmasa nga mantalaan: Ang Rebolusyunaryong Lunas at Dagling Lunas (MSP), Liyab (Kaguma) ngan Agham Bayan (LAB).

Mga patriyotiko nga magturutdo

Hadton Enero, nahitukod han Kaguma an usa nga bag-o nga tsapter ha usa nga unibersidad. Kaupod ha napili komo upisyal han tsapter an bag-o nga membro hini nga hi Ka Amber nga narekluta hadton urhi nga parte han 2024. “Nangangrapkap pa ako ha yana kundi san-o man diri ko naaabat nga kulang ako bisan bag-uhan ako tungod ha maupay nga pagtagad ngan pag-alalay han mga kasama,” sigon kan Ka Amber.

Ha atubangan han damo nga trabaho ngan mga personal nga ginkakahitapo ha kinabuhi, nananalinguha hiya para dirudiretso nga magpatuman han buruhaton komo upisyal han tsapter. Sering niya, nahihimo niya ini ha pagtapod ngan pagkatin ha mga prinsipyo ngan pagbaton ha mga pakiana nga “kay ano” ngan “para kanay.”

Sigon ha Kaguma, kinahanglan pakusgon hini an kalugaringon agud direkta nga makagpartisipar ha armado nga pakig-away, mag-amot ha BHB, ngan bumulig ha pag-oorganisa ha kabaryuhan para ha pagpapanday han rebolusyunaryo nga pagkaurusa ngan pakigbisog han katawhan.

Pagtambal ha krisis han katilingban

Ha usa nga prente gerilya ha Luzon, sinakob an usa nga grupo han MSP nga ginkokomponer han mga doktor, propesyunal ngan mga pankalibsugan nga estudyante agud maglansar han usa nga medical mission para ha masa ngan hukbo. “Ha pagsakob ha sona, diri masayon an amon mga gin-agian ngan nagin eksperyensya labina nga panahon han makusog nga pag-inuran,” pagpapasaro han usa nga doktor.

Igintindog nira an usa nga klinik diin iginlansar an konsultasyon ha mga pasyente ngan gindumara an guti nga laboratoryo. Ginbaton han MSP an mga simple ngan kumplikado nga mga sakit han mga Pula nga mangaraway, ngaduha pisikal ngan mental.

Ha sakob han hukbo, naeksperyensyahan nira an simple nga kinabuhi, an mga sakripisyo ha pagpapasulong han gerra han katawhan ngan an mapaso nga pagkarawat han masa nga parag-uma. “Ini nga akon mga eksperyensya mas dugang nga nagpadig-on ngan nagpalarab han akon rebolusyunaryo nga diwa,” estorya pa han doktor.

Samtang, naglansar han asembleya hadton Agosto 2 an mga pankalibsugan nga estudyante tikang ha dirudilain nga unibersidad agud tukuron an usa nga tsapter han MSP. Dako nga pitad ini para ha pagpapahangkop han MSP ha mga pankalibsugan nga estudyante ha demokratiko nga rebolusyon han katawhan.

Mga siyentisya para ha DRK

Unom kabulan an programa para ha tour-of-duty (TOD) ha BHB ni Ka Langga, membro han LAB ngan usa nga hadto anay estudyante han kurso nga computer engineering ha usa nga pribado nga unibersidad. Hini nga panahon, dumig-on an iya karuyagon nga magserbe han bug-os nga panahon ha kabaryuhan. “Hadton nag-TOD ako, mas napadig-on an desisyon nga magpultaym tungod kay nakit-an ko ini han bug-os ngan napamatud-an an katukmaan ngan panginahanglan nga magserbe komo mangaraway,” sering niya.

Nakit-an niya mismo an mapaso nga pagkarawat ngan paghigugma han masa ha hukbo han katawhan ha prente nga ira gin-gigiusan. “Hira, nga pinakatiniyupi ha katilingban, may wada pa nga pakaunon an mga mangaraway, bumakyang para ha pagkuha han suplay para ha pagsuporta ha hukbo, ngan magpartisipar ha mga rebolusyunaryo nga buruhaton,” estorya niya.

Ha kasyudaran, padayon liwat nga ginpapanday han LAB an mga aktibista ngan kadre hini komo mga pultaym nga organisador ha sektor. Pamaagi liwat ini agud isahon an kapukawan ngan kaandaman han iya mga membro nga hasugon an dalan han armado nga pakig-away sugad ni Ka Langga.

Ginkuha ha Liyab, Ang Rebolusyonaryong Lunas ngan Agham Bayan.