Atubangan sa nagkagrabeng pasismo sa rehimeng Marcos, labawng nagdilaab ang rebolusyonaryong determinasyon sa mga magtutudlo, duktor, nars, siyentista, inhinyero, ug uban pang mga propesyunal nga misalmot ug misuporta sa gubat sa katawhan. Padayon nilang gipalig-on ang ilang tagsa-tagsang rebolusyonaryong organisasyon aron magsilbing tinubdan sa suporta ug bag-ong mga manggugubat sa Bagong Hukbong Bayan (BHB).

Sa inspirasyon sa kalihukang pagtul-id sa Partido, subling gipakusog ang Katipunan ng mga Gurong Makabayan (Kaguma), Makabayang Samahang Pangkalusugan (MSP), ug Liga ng Agham para sa Bayan (LAB). Lagsik nga namahayag ang maong mga kahugpungan sa mga init nga katilingbanong isyu. Regular o kanunay nilang gipagawas ang ilang rebolusyonaryong mga pangmasang mantalaan: Ang Rebolusyonaryong Lunas ug Dagling Lunas (MSP), Liyab (Kaguma), ug Agham Bayan (LAB).

Mga makinasudnong magtutudlo

Niadtong Enero, gitukod sa Kaguma ang usa ka bag-ong balangay sa usa ka unibersidad. Lakip sa mga napili isip upisyal sa balangay mao ang bag-ong myembro nga si Ka Amber, nga narekrut sa ulahing bahin sa 2024. “Nagkamulo pa ko karon, pero wala gyud ko mobati nga kulang bisan bag-o pa ko tungod sa maayong trato ug pag-alalay sa mga kauban,” matud ni Ka Amber.

Atubangan sa daghang trabaho ug personal nga mga hagit sa kinabuhi, naningkamot siya para sa padayong pagpatuman sa iyang katungdanan isip upisyal sa balangay. Matud niya, naghimo niya kini tungod sa pagsalig ug paghupot sa mga prinsipyo ug pagtubag sa pangutana nga “ngano” ug “para kang kinsa.”

Sumala sa Kaguma, kinahanglan nga palig-onon niini ang kaugalingon aron direktang makasalmot sa armadong pakigbisog, motampo sa BHB, ug motabang sa pag-organisa sa kabanikahan alang sa pagpanday sa rebolusyonaryong panaghiusa ug pakigbisog sa katawhan.

Pag-ayo sa krisis sa katilingban

Sa usa ka natarang gerilya sa Luzon, misulod ang usa ka grupo sa MSP nga gilangkuban sa mga duktor, propesyunal, ug mga estudyanteng panglawas aron maglunsad og misyong medikal para sa masa ug hukbo. “Sa pagsulod sa sona, dili sayon ang among naagian ug mga kasinatian, ilabina sa kusog nga pag-ulan niadtong tungura,” paambit sa usa ka duktor.

Gitukod nila ang usa ka klinika diin gipahigayon ang konsultasyon sa mga pasyente ug gipaganar ang gamay nga laboratoryo. Gitubag sa MSP ang yano ug kumplikadong mga sakit sa mga Pulang manggugubat, sa lawas man o sa pangisip.

Sulod sa hukbo, nasinati nila ang simpleng kinabuhi, ang mga sakripisyo sa pagpaasdang sa gubat sa katawhan, ug ang mainitong pagdawat sa masang mag-uuma. “Kini nga mga kasinatian mao ang mas nagpalig-on ug nagpadilaab sa akong rebolusyonaryong diwa,” asoy pa sa duktor.

Samtang, naglunsad og asembliya niadtong Agosto 2 ang mga estudyanteng panglawas gikan sa lain-laing unibersidad aron tukuron ang usa ka balangay sa MSP. Daku kining lakang alang sa pagpagakos sa MSP sa mga estudyanteng panglawas sa demokratikong rebolusyon sa katawhan.

Mga siyentista para sa DRK

Unum ka bulan ang programa sa tour-of-duty (TOD) sa BHB ni Ka Langga, myembro sa LAB ug kanhi estudyante sa computer engineering sa usa ka pribadong unibersidad. Niining panahona, nagpatigbabaw ang iyang tinguha nga mag-full-time na sa kabanikahan. “Sa akong pag-TOD, mas napalig-on ang paghukum nga magpultaym tungod kay ako na kining hingpit nga nakita ug napamatud-an ang kahusto ug kapanginahanglan nga magsilbi isip manggugubat,” matud niya.

Iya mismong nasinati ang mainitong pagdawat ug pagmahal sa masa sa hukbong bayan sa larangang ilang gilihukan. “Sila, nga labing gipahimuslan sa katilingban, aduna pay luna nga pakan-on ang mga manggugubat, motabang sa pagkuha og suplay alang sa paglahutay sa hukbo, ug moduyog sa mga rebolusyonaryong kalihukan,” asoy niya.

Sa kasyudaran, padayon usab nga gipanday sa LAB ang mga aktibista ug kadre niini isip mga full-time nga organisador sa sektor. Pamaagi usab aron ipataas ang kahimatngon ug kaandamon sa mga myembro niini nga mosubay sa dalan sa armadong pakigbisog sama ni Ka Langga.

Kinutlo gikan sa Liyab, Ang Rebolusyonaryong Lunas, ug Agham Bayan.