Aksyon kontra demolisyon ha Marikina. Napugngan han mga residente han Agora, Barangay Sto. Niño, Marikina City an plano nga demolisyon ha ira komunidad hadton Oktubre 15. Nagtindog hira han kampuhan hadton Oktubre 14. Masobra 53 nga kablas nga pamilya an nanenelikado nga mapalayas ha komunidad ha luyo han ira masobra 40 katuig nga pagpuyo ha lugar. Tungod ha protesta, nagsaad an lokal nga gubyerno han relokasyon para ha mga apektado nga residente.

Barikada ha Benguet. Inabot ha 400 nga residente han duha nga barangay ha Mankayan, Benguet an nagbarikada hadton Oktubre 13 kontra ha panginginlabot han Crescent Mining and Development Corporation ha ira ansestral nga katunaan. Nagserbe liwat ini nga pormal nga pagtukod han alyansa nga No Mines Movement of Guinaoang and Bulalacao.

Paggios kontra-mina ha Dupax del Norte, NV. Tikang Septyembre 17 nagtindog han barikada an mga residente han Barangay Bitnong ha Dupax del Norte ha Nueva Viscaya kontra ha Woggle Corporation. Nagtikagrabe an gitgitay han mga residente ngan kompaniya han magpagawas an usa nga korte ha prubinsya han Temporary Restraining Order hadton Oktubre 14 kontra ha barikada. Ginbungkag han mga pulis an barikada hadton Oktubre 16 ngan gin-aresto an tulo nga residente. Layon gihap hira nga nakagawas.

Wala-tuo nga ginkukundenar han mga residente, singbahan, grupo ngan indibidwal an pandarahug han pulis. Naglansar hira han karaban ngan protesta ha Nueva Viscaya Provincial Capitol hadton Oktubre 20 agud kundenaron an kawaray-aksyon han lokal nga gubyerno. Naglansar liwat han paggios ha pareho nga adlaw an grupo nga Kalikasan PNE ha atubangan han Department of Environment and Natural Resources.

Nakatalaan liwat nga maglansar han protesta ha Oktubre 21 an Anakbayan United Kingdom ngan iba pa nga nasyunal demokratiko nga organisasyon ha UK ha upisina han Metals Exploration PLC Office ha London agud kundenaron an pandambong ha kalibungan han ira kompaniya.