Padayon nga ginbabay-og han pampulitika nga krisis an reaksyunaryo nga estado nga ginpapadalagan han mga burukrata-kapitalista. Diri nakalma ngan niruniyan naglalarab an kangalas han masa ha nabubuksas nga mas damo nga kaso han korapsyon. Diri napaparong an kagiusan nga walkout han mga estudyante, ngani nagsasamwak pa ha mga unibersidad ha Manila ngan iba pa nga parte han nasud. Nagsasamwak an paggios han mga sibiko nga grupo, tawo ha singbahan, trabahador, kablas ngan iba pa nga sektor.

Higluag nga alyansa han katawhan an nahitutukod nga pursigido nga kab-uton an hustisya para ha katawhan nga biktima han kriminal nga korapsyon. Tinindog na an usa nga hilapad ngan gamhanan nga kagiusan han katawhan nga mabay-og ha rehimen US-Marcos ngan maghuhuman ha paghahadi han mga burukrata-kapitalista nga grupo nga aada ha poder.

Nagpapakamalimpyo ngan napostura hi Marcos nga kinakalasan o nangangalas ha mga parupangawat. Waray pulos ha katawhan an sikreto nga imbestigasyon han ginbug-os niya nga “independent commission” nga piho nga waray iba nga larang kundi tahuban an kamatuoran nga bilyun-bilyon kapiso nga porsyento ha mag-anomaliya nga kontrata an nadangat ha Malacañang, ngan nga hi Marcos mismo an hadi ngan aada ha pungkay han bukid han basura han korapsyon. Tulo kabulan kahuman niya igdeklara nga “maawod naman kamo,” klaro ha mata han katawhan nga hi Marcos mismo an numero uno nga waray awod ngan pinakabutaray ha pagbubursa han bilyun-bilyo kapiso nga pondo han katawhan.

Pirit nga ginsasakyan han grupo nga Duterte an hiluag nga protesta han katawhan kundi usa kahakop la an ira nauuwat. Diri nira matahuban an kalugaringon nga krimen ngan pangawat, labina hadton nakalingkod nga presidente hi Rodrigo Duterte. Utro nga nahibabalik an bilyun-bilyon nga iginbursa han mga Duterte ha kontrata ha Pharmally hadton panahon han pandemya, ₱51 kabilyon flood control project ni Paolo Duterte ngan ₱125 kamilyon nga confidential and intelligence fund ni Sara Duterte. Bilyun-bilyon kapiso nga kontrata liwat an nahingadto ha hadto anay suruguon ni Duterte nga hi Bong Go, ngan iba pa nga mga alyado.

Atubangan han nagsasamwak nga hurub-hurob agud liwanan an naghahadi nga rehimen, iginpakita han imperyalismo nga US nga madig-on hini nga ginsusuportahan an niyutiyo hini nga hi Marcos. Diri pala maiha, personal nga ginbisita han usa nga upisyal han embahada han US an pagbista ha ICI komo pamatuod han suporta hini.

Nangangalas gud an katawhan nga ha luyo han grabe nga kangalas ha korapsyon, butaray nga gin-utro ni Marcos ngan mga kakunsabo niya ha kongreso an pagpapalusot han dirudilain nga pork barrel ha badyet ha 2026. Pirit nga iginsulod an ₱281 kabilyon nga pork barrel ni Marcos ha porma han unprogrammed appropriations, confidential and intelligence funds ngan iba pa. Aada ha ₱414 kabilyon naman an pork barrel nga ginbababhinay han korap nga mga kongresista ngan senador.

Padayon nga nabubuksas kun tiunan-o ngatanan nga programa han gubyerno putos han korapsyon. Labot ha mga proyekto nga flood control, bilyun-bilyon kapiso liwat an ginkakawat ha mga farm-to-market road, multipurpose building, health center, tulay, dalan, sugad liwat ha pampubliko nga pondo para ha ayuda, sweldo, pensyon ngan seguro.

Maaram gud an katawhan kun hirahin-o ngan hain ini nga mga proyekto nga ginkukurakot han mga korap nga upisyal han gubyerno ngan militar ngan mga kakunsabo nira nga dagko nga negosyante. Ha bubligay han magkalain-lain nga sektor angay la nga aliskayon ini, igsadokumento, ibuksas ngan itampalo ha mga kriminal nga burukrata-kapitalista.

Kinahanglan diri undangon han mga Pilipino an panunukot ngan pagpapabaton ha mga burukrata ha ira mga paggios ngan protesta. Kabakyang an mga kabatun-an, kinahanglan dugang nga pakusgon han masa nga kablas nga anakbalhas ngan mga trabahador an ira tingog kontra ha korapsyon, burukrata kapitalismo ngan pasismo, ngan agud paaningalon an guliat para ha pagpapatapos ha pakuri nga rehimen US-Marcos ngan paghahadi-hadian han grupo nga Duterte.

Pinakamagsasamwak pa ini ha mga kablas nga komunidad ngan pabrika, diin pinakadamo ngan pinakanangangalas an masa nga anakbalhas nga biktima han korapsyon ngan konsabuhay han mga burukrata-kapitalista ngan dagko nga negosyante. Labot ha karukayaknon han pagbaha ha mga komunidad nga bunga han korapsyon ngan palpak nga gubyerno, kinahanglan palandawon an karukayaknon han himubo nga suhol, hiluagan nga disempleyo han katawhan, hitaas nga presyo han mga papliton, hitaas nga gastos ha edukasyon, waray wantas nga paghitaas han presyo han gasolina, dunot nga pankatilingban nga serbisyo ngan iba pa nga bunga han konsabuhay han mga korap nga burukrata-kapitalista ngan hakog ha tubo nga dagko nga burgesya.

Pahiluagon pa an kagiusan protesta kontra ha korapsyon ha pinakadamo nga prubinsya, ha mga bungto ngan syudad. Milyun-milyon an biktima han palpak ngan diri mahigamitan nga mga imprastruktura nga ginmalgastaran han kwarta han katawhan. Tirukon an ira kangalas ha mga trahedya nga nahiaaguman nira ha kada may kalamidad han bagyo, linog o bisan simple nga pag-uran. Papagbatunon an mga burukrata-kapitalista ha krimen nira nga hinungdan han kalumos ha baha han burubug-os nga komunidad ngan mga umhanan, pagbagsak han mga tulay, karuba han mga kalsada, karumpag han mga bilding ngan urukyan ngan iba pa. Mahugot an sumpay ha burukrata kapitalismo han kalugi han mga parag-uma, himubo nga suhol han mga trabahador, pagbagsak han kita han mga drayber, pagbagsak han pakabuhi han mga kablas, pagkawara han urukyan, kalumos ha utang, dislokasyon ngan pagpapalayas ha tuna, ngan damo nga nawong pa han kakablasan.

Kinahanglan itig-ob han mga estudyante nga kabatan-unan ngan iba pa nga sektor nga natindog kontra ha korapsyon an ira ranggo ha kusog han masa nga anakbalhas ha kasyudaran ngan kabaryuhan. Kun may sobra man nga ginkakahadlukan hi Marcos nga mabay-og ha iya paghahadi, iton an duruyog nga pag- walkout ha mga eskoylahan, pagwewelga han mga trabahador, martsa han mga parag-uma, welga han mga empleyado han gubyerno, magturutdo ngan akademiko, ukoy-pasada ha pampubliko nga transportasyon ngan iba pa nga porma han duruyog nga paggios han katawhan.

Madig-on nga naabante an narabunos nga kagiusan protesta han katawhan kontra ha korapsyon ngan burukrata kapitalismo tungod ha pangunguna han mga nasyunal-demokratiko nga organisasyon ngan alyansa. Hira an pinakadeterminado ngan pinakapursigido ha pag-abot ngan pagpukaw ha masa. Hira an pinakanagpupursige nga bug-uson an pinakahilapad nga pagkakaurusa han katawhan kontrah ha rehimen US-Marcos.

Samtang ginpaparabunos an kagiusan protesta, kinahanglan idungan han mga nasyunal-demokratiko nga pwersa an marayhak nga kagiusan nga pag-aram ha katilingban ngan rebolusyon Pilipino ha ranggo han masa. Kinahanglan waray kasumo nga ig-eksplikar nga an korapsyon ngan anomaliya unob ha bagakolonyal ngan bagapyudal nga sistema, ngan nga mahuhuman la ha pagpapabagsak ha imperyalismo, pyudalismo ngan burukrata kapitalismo.

An hingyap han katawhan nga pagbabag-o han sistema makakab-ot la ha pagpapasulong han demokratiko nga rebolusyon han katawhan pinaagi han armado nga pakig-away. Sanglit kinahanglan tukuron an pinakadamo nga tsapter han mga organisasyon han National Democratic Front ha ira ranggo ngan pursigido nga suportahan ngan pakusgon an Bagong Hukbong Bayan. Kinahanglan pahilarumon ngan pahiluagon an paggamot han Partido ha ranggo han masa agud magserbe nga butagtok ngan taliba han ira panmaihaan nga pakigbisog.