Ha distansya nga lima kametros, ginpabuthan han usa nga yunit han Bagong Hukbong Bayan (BHB)-Leyte Island (Mt. Amandewin Command) an pasista nga tropa han 14th IB ha bungto han Javier, Leyte hadton Oktubre 15 han aga. Sigon ha yunit, damo an nahireport nga kaswalti ha mga bergudo nga sundalo.

An yunit han 14th IB nga aada ha erya nagpapatuman hadto han gintatawag nga combat-clearing operations ha mga bubkiron ngan salog giutan han Barangay Odiong ngan Barangay Caraye ha Javier. Kaparte an operasyon han hiluagan nga pankombat nga operasyon han 14th IB ha mga barangay nga lupgop han mga bungto han Javier ngan Abuyog.

Patraydor ngan talawan nga iginpaling han 14th IB an atake hini ha sibilyan nga katawhan ha Barangay Caraye, Javier. Kasunod han opensiba han BHB, igin-imponer han 14th IB ha komunidad an hamlet o “lockdown” diin gindidid-an an masa nga tumukad ha ira mga umhanan.

Agud tahuban an ira kaperdihan, nagbinuwa an 14th IB ngan 802nd IBde nga may nakumpiska hira nga riple tikang ha BHB ha pag-atake. Nagpagawas pa ha social media an militar han mga peke nga litrato han mga pusil nga “nahibilin” kunuhay han BHB.