Naglansar hin usa kasemana nga protesta an mga organisasyon han parag-uma kaupod an dirudilain nga sektor komo pagtigaman han bulan han mga parag-uma. Agud palandawon an panawagan han mga parag-uma, igintukod nira an usa nga kampuhan ha atubangan han Department of Agrarian Reform Central Office ha Quezon City tikang Oktubre 15 ngada 21. Iginlansar ha kampuhan an pagbisita, pakikig-usa ngan diskusyon kaupod an dirudilain nga sektor. Nagkamayda han mga workshop, medical mission ngan paghahatag han materyal nga suporta ha mga parag-uma.

Labot hini, usa nga rali an ginpangunahan han Amihan hadton Oktubre 15 para tigamnan an Pankalibutan nga Adlaw han Kababayin-an nga Parag-uma. Hadton Oktubre 16, utro nga nagmartsa an mga grupo ha Quezon City ha pangunguna han mga parag-uma tikang ha isla han Negros para ha Pankalibutan nga Adlaw han Kagutom. Kinabuwasan, nagprotesta hira ha hedkwarters han Armed Forces of the Philippines ha Quezon City agud kundenaron an militarisasyon ha kabaryuhan. Usa nga gab-i han pasundayag an iginlansar nira ngan han mga grupo han artista hadton Oktubre 19 ha UP Diliman. Nagprotesta liwat hira ha Department of Social Welfare and Development hadton Oktubre 20 agud ig-insister an kumpensasyon para ha destroso nga dara han kalamidad.

Mahuhuman an protesta han mga parag-uma ha Oktubre 21, anibersaryo han buwa nga reporma ha tuna han Presidential Decree No. 27 ni Marcos Sr. Magios hira kaupod an iba pa nga sektor ha Liwasang Bonifacio kontra ha korapsyon han rehimen Marcos ngan barkadahan nga Duterte. Iginpapanawagan nira an pagpapalayas ha poder han duha nga pinuno nga korap.