Tikang Septyembre, unom nga sarakyan nga pandagat nga tikang kunuhay ha Venezuela an ginpasabog han US ha Carribean Sea ha akusasyon nga nagdadara ini han mga “narko-terorista” ngan nagbibiyahe han iligal nga druga. Ginhimo an mga pagpapasabog komo parte han panibag-o nga serye han panmilitar nga agresyon ha Venezuela nga waray basaranan nga gin-aakusaran han presidente han US nga hi Donald Trump nga nasuporta ha mga “narko-terorista.” Inabot na ha 27 an ekstra-hudisyal nga ginpatay han US hini nga pangatake.

Kadungan han mga pagpapasabog, ginpapintas han US an panmilitar nga presensya han US ha Caribbean Sea pinaagi han pagpapadara han mga warship, usa nga nuclear-powered nga submarino, ngan iba pa nga sarakyan nga pan-gerra. Nagpapalupad liwat ini han mga helikopter, fighter jet ngan mga B-52 bomber ha internasyunal nga kahanginan hirani ha Venezuela.

Ginmanduan liwat ni Trump an Central Intelligence Agency nga maglansar han mga sikreto nga operasyon ha sakob han Venezuela kontra ha gubyerno hini ngan katawhan. Nasubay ini ha pahayag ni Trump nga himuon an dugang pa nga panmilitar nga aksyon kontra ha Venezuela ngan plano nga pagsaliwan han rehimen ha soberano nga nasud. Nag-imponer pa han $50 kamilyon nga pabuya hi Trump para ha pag-aresto han presidente han Venezuela nga hi Nicolas Maduro. Dugang ini ha naeksister na nga sangsyon (sirot) ha ekonomiya nga maiha na nga igin-imponer han US ngan alyado hini nga nasud.

Kakunsabo han imperyalismo nga US ha kampanya nga agresyon an mga maka-Tuo nga grupo ha sakob han Venezuela. Hadton syahan nga semana han Oktubre, iginbuksas han gubyerno ni Maduro an pag-atentar hini nga mga grupo nga maglansar han usa nga “false flag” nga operasyon diin magtatanum ngan magpapasabog ini han bomba ha embahada han US ha Caracas, syudad han Venezuela, agud mas papintason pa an tensyon.

Bisan kun serrado an embahada tikang han nahunong an diplomatiko nga sumpayan han Venezuela ngan US hadton 2019 pa, mayda mga empleyado ngan pwersa ha seguridad nga nagpapabilin ha bilding. Kasunod hini nga balita, iginpahunong ni Trump an anuman nga paningkamot han iya gubyerno nga makig-estorya ngan makigsarabot ha Venezuela.

Waray magpabantad an Venezuela ngan gubyerno nga Marudo ha mga pangatake ngan pananarhug ni Trump. Sigon kan Marudo, “diri gud hira makakasulod ha Venezuela” ngan andam nga igdepensa han militar ngan katawhan Venenzuela an ira nasud ngan soberaniya.

Pankalibutan nga suporta ha Venezuela

Hiluagan nga ginsukna han mga grupo ha bug-os nga kalibutan an agresyon han US ngan ni Trump ha Venezuela. Nanawagan an International League of Peoples’ Struggle (ILPS) nga atuhan an pag-atentar nga saliwnan an gubyerno han Venezuela ngan tanan nga porma han hybrid nga pakigerra nga naggrabe ha ilarum ni Trump.

Waray hunong an agresyon han US ha gubyerno han Venezuela tikang han tumindog ini kontra ha mga imperyalista nga dikta hini. “Waray hunong an pag-atentar han US nga pabagsakon an demokratiko nga gin-eleher nga gubyerno han Venezuela, determinado nga higupon an kita tikang ha lana han nasud agud parikuhon an mga monopolyo kapitalista ngan mga mamuruhunan,” sigon ha ILPS.

Pahayag han grupo, an agresyon han US magduduso la ha tikadamo nga katawhan han kalibutan nga suportahan an Venezuela ngan ira makatadungan nga pakigbisog para ha nasyunal nga soberaniya kontra ha imperyalismo nga US.

Ha Pilipinas, ginpangunahan han Philippine-Bolivarian Venezuela Friendship Association ngan Bagong Alyansang Makabayan an pagsuporta ha gubyerno ngan katawhan han Venezuela. Mahugot hira nga nakikigsumpayan kan Chargé d’Affaires Richard Espinoza Lobo han Bolivarian Republic of Venezuela Embassy para ha magkalain-lain nga aktibidad ngan katitirok.

Kalakip na dinhi an pakikigmiting nira ha mga tinaglawas han Makabayan Bloc ha House of Representatives hadton Oktubre 13. Nabug-os dinhi an plano nga pagsubmiter han Makabayan Bloc han usa nga resolusyon ha Kongreso agud suknaon an militarismo han US ngan suportahan an pakigbisog han katawhan Pilipino para ha kamurayawan, nasyunal nga soberaniya ngan katungod ha pagdesisyon-ha-kalugaringon han tanan han mga nasud.