Ginringgal ngan ginhadlok han mga elemento han Armed Forces of the Philippines an mga delegado han International Solidary Mission (ISM) nga naglansar han imbestigasyon ngan pangaliskay tikang Oktubre 11 tubtub 14. Nakada ha Pilipinas an delegasyon para mahibaruan an nahiaaguman nga krisis ha klima, pandambong ha kalibungan, ngan militarisayon ha komunidad han mga parag-uma ngan minoriya ha Rizal, ngan ha mga isla han Mindoro, Samar, Leyte ngan Negros.

Butaray nga gintiktikan ngan ginkuhaan han litrato han mga sundalo an mga ginlansaran han aktibidad han ISM. Ginkuha nira an ngaran han mga delegado, ginsundan han mga armado ngan ginsubaybayan tubtub ha ira ginhihigdaan. Pira kabeses liwat nagpalupad han drone ha bawbaw han mga kampuhan diin iginhimo an mga imbestigasyon.

Hadton Oktubre 14, napiritan an mga delegado nga tapuson hin mas temprano an aktibidad hini ha Mindoro tungod ha pag-abot han narunapulo nga pulis ngan sundalo nga may dara nga higlaba nga pusil ha kampuhan. Nagdurot ini hin grabe nga kahadlok ha mga minoriya ngan delegado. Ha Rizal, butaray hira nga gindid-an nga maghimo han aktibidad tungod kay waray hira “permit.” Paggikan han mga bumisita nga delegasyon, dirudiretso nga ginringgal han mga sundalo an minoriya nga Mangyan ha Mindoro ngan Dumagat ha Rizal.

Sigon ha report han mga minoriya nga Dumagat ha Tanay, Rizal nag-agsub an presensya han militar ha komunidad ngan nagtikang nga magpatawag han mga residente para ha interogasyon kahuman an ISM. Ha Abra de Ilog, Occidental Mindoro, nagpapadayon an pan-gigipit han mga sundalo ha komunidad nga nakakaapekto ha pagpapakabuhi han mga residente ngan nagdudurot han kagutom ha mga parag-uma.

Kadungan han pan-gigipit ha ISM, waray wantas liwat an pangabuso han militar ha iba pa nga parte han nasud.

Pasista nga pangatake ha Negros. Waray hunong an panlasurbo ngan pasista nga pangatake han mga sundalo ha isla ha naglabay nga bulan. Nahilista an luun-luon nga mga kaso han pagtalapas ha tawhanon nga katungod ha butnga han mga pankombat nga operasyon hini ha damo nga barangay.

Pinakaurhi hini an panmusil han 79th IB nga nagdurot han kasamad ha parag-uma nga hi Kato Rizal ngan iya menor-de-edad nga umangkon samtang nakuha han pulot ha Sitio Nabaisan, Barangay Minapasok, Calatrava, Negros Occidental hadton aga han Oktubre 17. Ha urhi nga report diri pa natatad-an an ginkamumutangan han menor-de-edad.

Hadton Oktubre 7, ginransak han 94th IB an balay han usa nga parag-uma ha Sityo Manluki ha Barangay Carabalan. Usa nga parag-uma liwat an ginsikmit han 94th IB ha Barangay Buenavista ngan piniritay hiya nga ginpagiya ha pankombat nga operasyon. Ha Toboso, piniritay nga ginsulod ngan ginransak han 79th IB an balay han duha nga parag-uma hadton Oktubre 11. Ha Negros Oriental, nahireport naman an pananamok ngan pagkakampo han 62nd IB ha mga sentro han komunidad, singbahan ngan eskoylahan.

Pagtalapas ha IHL. Ginpapakurian ngan gin-gigipit han 703rd IBde an pamilya ngan mga grupo ha tawhanon nga katungod ha pagbawi ha patay nga lawas han usa nga ginsesering nga Pula nga mangaraway nga napatay ha agway han militar ngan BHB ha Norzagaray, Bulacan hadton Oktubre 17. Ginkundenar han mga grupo ha tawhanon nga katungod an pagdiri han militar nga iginhatag ha pamilya an patay nga lawas ngan militarisasyon ha punerarya nga ginkamumutangan hini. Iba-iba liwat an estorya han militar hiunong ha nahitabo nga agway ngan pagdul-ong ha patay nga lawas.

Ha North Caloocan, naggrabe an militarisasyon han NTF-Elcac ngan han 12th Civil Military Operation ha mga barangay tikang hadton Oktubre 6. Ginsakop han militar an Barangay 175, 181-182 Pangarap Village ngan Barangay 187-188. Iginlalansar hini an kampanya han Red-tagging ngan pan-gigipit ha mga membro han progresibo nga grupo.

Pagpatay. Brutal nga ginpatay han kalalakin-an nga sakay han motorsiklo hi Niruh Kyle Antatico hadton Oktubre 10 ha Barangay Patag, Cagayan de Oro City. Hi Antatico usa nga hadto anay senior legal researcher ha National Irrigation Administration Region 10 nga ginsesering nga nagbuksas han damo kaupay nga pangawat ngan anomaliya ha sakob han ahensya kalakip an nawawara nga pondo, substandard nga proyekto, ngan mga peke nga kontrata. Nanawagan han hustisya an Nafeda-Courage para kan Antatico.