Aksyon batok sa demolisiyon sa Marikina. Napugngan sa mga lumulupyo sa Agora, Barangay Sto. Niño, Marikina City ang planong demolisyon sa ilang komunidad niadtong Oktubre 15. Nagtukod sila og kampuhan niadtong Oktubre 14. Kapin 53 ka kabus nga pamilya ang nahulgang mapahawa sa komunidad bisan og kapin 40 ka tuig na silang nanimuyo sa lugar. Tungod sa protesta, nagsaad ang lokal nga kagamhanan og relokasyon alang sa mga apektadong lumuluyo.

Barikada sa Benguet. Mikabat sa 400 ka lumulupyo sa duha ka barangay sa Mankayan, Benguet ang nagbarikada niadtong Oktubre 13 batok sa pagsulod sa Crescent Mining and Development Corporation sa ilang yutang kabilin. Nagsilbi usab kining pormal nga pagtukod sa alyansang No Mines Movement of Guinaoang and Bulalacao.

Protesta kontra-mina sa Dupax del Norte, NV. Gikan sa Setyembre 17, nagmuntar og barikada ang mga residente sa Barangay Bitnong sa Dupax del Norte sa Nueva Vizcaya batok sa Woggle Corporation. Migrabe ang tensyon tali sa mga lumulupyo ug kumpanya dihang nag-isyu og Temporary Restraining Order niadtong Oktubre 14 ang usa ka korte sa prubinsya batok sa barikada. Gibungkag sa mga pulis ang barikada niadtong Oktubre 16 ug giaresto ang tulo ka lumulupyo. Nakagawas ra gilayon sila.

Walag too nga gimakmak sa mga residente, simbahan, grupo ug indibidwal ang pagpanghasi sa mga pulis. Naglunsad sila og karaban ug protesta sa Nueva Vizcaya Provincial Capitol niadtong Oktubre 20 aron makmakon ang kawalay aksyon sa lokal nga gubyerno. Naglunsad usab og protesta sa parehong adlaw ang grupong Kalikasan PNE atubangan sa Department of Environment and Natural Resources.

Nakatakda usab nga maglunsad og protesta niadtong Oktubre 21 ang Anakbayan United Kingdom ug ubang nasudnon demokratikong organisasyon sa UK sa upisina sa Metals Exploration PLC Office sa London aron makmakon ang pagkawkaw sa kumpanya sa kinaiyahan.