Padayon nga gitay-og sa pulitikanhong krisis ang reaksyunaryong estadong gidumalahan sa mga burukrata-kapitalista. Wala nahubas ug matag-karon-ug-unya nga miulbo ang kasuko sa masa sa nangabutyag nga mas daghang kaso sa korapsyon. Wala naupos ang mga walkout sa mga estudyante, hinunua mikuyanap pa kini sa mga unibersidad sa Maynila ug uban pang bahin sa nasud. Nagakaylap ang protesta sa mga grupong sibiko, tawong simbahan, mamumuo, mga kabus ug uban pang sektor.

Natukod ang lapad nga alyansa nga desididong kab-uton ang hustisya alang sa katawhang biktima sa kriminal nga korapsyon. Nagbarog na ang usa ka lapad ug gamhanang kalihukan sa katawhan nga motay-og sa rehimeng US-Marcos ug motapos sa paghari sa mga burukrata-kapitalistang paksyon nga anaa sa poder.

Nanghunaw ug nagpaaron-ingnon si Marcos nga nakurat o nasuko sa mga pagpangawat. Walay kapuslanan sa katawhan ang sikretong imbestigasyon sa gitukod niyang “independent commission” nga klarong walay laing laraw kundili tabunan ang kamatuuran nga bilyun-bilyong piso nga porsyento sa maanomalyang kontrata ang nagasaka sa Malacañang, ug nga mismong si Marcos ang hari ug anaa sa pungkay sa nagtabunok nga basura sa korapsyon. Tulo ka bulan human niyang ideklarang “kaulaw pud mo,” tin-aw sa mata sa katawhan nga si Marcos mismo ang numero unong walay ulaw ug pinakahangol sa pagbulsa sa binilyong pisong pondo sa katawhan.

Pugos nga ginasakyan sa paksyong Duterte ang lapad nga protesta sa katawhan apan dyutay lamang ang ilang nalingla. Dili nila matabunan ang kaugalingong krimen ug korapsyon, ilabina niadtong nakalingkod isip presidente si Rodrigo Duterte. Subling nabutyag ang binilyong gibulsa sa mga Duterte sa kontrata sa Pharmally niadtong panahon sa pandemya, ₱51 bilyon flood control project ni Paolo Duterte ug ₱125 milyong confidential and intelligence fund ni Sara Duterte. Binilyong pisong kontrata usab ang napadulong sa alalay kaniadto ni Duterte nga si Bong Go, ug uban pang mga alyado.

Atubangan sa kaylap nga diskurso aron pulihan ang nagharing rehimen, gipakita sa imperyalismong US nga lig-on niining ginasuportahan ang papet niining si Marcos. Bag-o lang, personal nga gibisita sa usa ka upisyal sa embahada sa US ang pagdungog sa ICI isip timaan sa suporta niini.

Grabe na ang kasuko sa katawhan nga taliwala sa grabeng korapsyon, dayag nga gisubli ni Marcos ug mga kakunsaba niya sa kongreso ang pagsal-ot sa klase-klaseng pork barrel sa badyet sa 2026. Pugos gisal-ot ang ₱281 bilyong pork barrel ni Marcos sa porma sa unprogrammed appropriations, confidential and intelligence funds ug uban pa. Anaa sa ₱414 bilyon usab ang pork barrel nga bahin-bahinon sa korap nga mga kongresista ug senador.

Padayon nga nabutyag ang tanang programa sa gubyerno nga puno sa korapsyon. Gawas sa mga proyektong flood control, bilyun-bilyong piso usab ang gikawkaw sa mga farm-to-market road, multipurpose building, health center, tulay, kalsada, ingonman sa pondo alang sa ayuda, sweldo, pensyon ug seguro.

Labaw nga nasayod ang katawhan kung kinsa ug asa ang maong mga proyekto nga gikurakot sa mga korap nga upisyal sa gubyerno ug militar ug mga kakunsabo nilang dagkung negosyante. Sa pagtinabangay sa lain-laing sektor, kining tanan angay susihon, idokumento, ibutyag ug itamparus sa mga kriminal nga burukrata-kapitalista.

Kinahanglang dili undangan sa mga Pilipino ang pagpaningil ug pagpanubag sa mga burukrata sa ilang mga kalihukan ug protesta. Kaagbay ang mga kabatan-onan, kinahanglang dugang pakusgon sa masang kabus ug mga mamumuo ang ilang tingog batok sa korapsyon, burukratang kapitalismo ug pasismo, ug aron palanugon ang singgit alang sa pagtapos sa paantus nga rehimeng US-Marcos ug paghari-hari sa mga Duterte.

Mipakaylap kini sa mga kabus nga komunidad ug pabrika, kung asa pinakadaghan ang nasuko nga masang anakpawis nga biktima sa korapsyon ug kunsabuhay sa mga burukrata-kapitalista ug dagkung negosyante. Gawas sa isyu sa paglunop sa mga komunidad nga resulta sa korapsyon ug palpak nga gubyerno, kinahanglang hatag duut ang isyu sa ubos nga suhulan, kaylap nga disempleyo sa kabatan-onan, pagmahal sa mga palaliton, pagtaas sa gasto sa edukasyon, walay puas nga pagsaka sa presyo sa gasolina, dunot nga katilingbanong serbisyo ug uban pa nga bunga sa kunsabuhay sa mga korap nga burukrata-kapitalista ug hakog sa ganansya nga dagkung burgesya.

Palapdon pa ang kalihukang protesta batok sa korapsyon sa pinakadaghang prubinsya, sa mga lungsod ug syudad. Milyun-milyon ang biktima sa palpak ug dili magamit nga mga imprastrukturang gigastuhan sa kwarta sa katawhan. Hugpungon ang ilang kasuko sa mga katalagman nga nasinati nila sa kadaut sa mga bagyo, linog o bisan sa simpleng pag-ulan. Panubagon ang mga burukrata-kapitalista sa ilang mga krimen nga nagbunga sa pagkaunlod sa mga komunidad ug sakahan sa baha, pagkahagba sa mga tulay, pagkaguba sa mga kalsada, pagdahili sa mga bilding ug panimalay ug uban pa. Hugot nalambigit ang burukrata-kapitalismo sa pagkapurdoy sa mga mag-uuma, ubos nga suhulan sa mga mamumuo, pagtiurok sa kita sa mga drayber, pagkahagba sa panginabuhi sa mga kabus, pagkawala sa puloy-anan, pagkalubong sa utang, dislokasyon ug pagpalayas sa yuta, ug daghan pang porma sa kapit-os.

Dapat isumpay sa mga estudyanteng kabatan-onan ug uban pang sektor nga mibarog batok sa korapsyon ang ilang han-ay sa kusog sa masang kabus sa kasyudaran ug kabanikanhan. Kung aduna may labing gikahadlukan si Marcos nga motay-og sa iyang paghari, kini mao ang dungan nga pag-walkout sa mga estudyante, pag-alsa sa mga mamumuo, martsa sa mga mag-uuma, welga sa mga empleyado sa gubyerno, magtutudlo ug akademiko, hunong-byahe sa mga drayber sa pangpublikong transportasyon ug uban pang porma sa hiniusang aksyon sa katawhan.

Lig-ong nagaabante ang nagbalud-balod nga kalihukang protesta sa katawhan batok sa korapsyon ug burukrata-kapitalismo tungod sa pagpanguna sa mga nasudnon-demokratikong organisasyon ug alyansa. Sila ang pinakadeterminado ug pinakamatinguhaon sa pag-abot ug pagpukaw sa masa. Sila ang labing nanglimbasog nga tukuon ang pinakalapad nga panaghiusa sa katawhan batok sa rehimeng US-Marcos.

Samtang ginapabwelo ang kalihukang protesta, kinahanglang ilunsad sa mga nasudnon-demokratikong pwersa ang lagsik nga kalihukang pagtuon sa katilingban ug rebolusyong Pilipino sa han-ay sa masa. Kinahanglang walay kapuol nga ipatin-aw nga ang korapsyon ug kahiwian natural sa semikolonyal ug semipyudal nga sistema, ug nga mahanaw lamang sa pagtapos sa imperyalismo, pyudalismo ug burukrata-kapitalismo.

Ang tinguha sa katawhan nga kausaban sa sistema makab-ot lamang sa pag-asdang sa demokratikong rebolusyon sa katawhan pinaagi sa armadong pakigbisog. Maong kinahanglang tukuron ang pinakadaghang balangay sa mga organisasyon sa National Democratic Front sa ilang han-ay ug hugot nga suportahan ug pakusgon ang Bagong Hukbong Bayan. Kinahanglang palalumon ug palapdon ang paggamot sa Partido sa han-ay sa masa aron magsilbing dugukan ug uyok sa ilang malungtarong pakigbisog.