Naglunsad og usa ka semanang protesta ang mga organisasyon sa mga mag-uuma kauban ang lain-laing sektor isip paghandum sa bulan sa mga pesante. Aron hatagag duut ang panawagan sa mga mag-uuma, nagtukod sila og kampuhan atubangan sa Department of Agrarian Reform Central Office sa Quezon City gikan sa Oktubre 15 hangtud 21. Sa kampuhan, gilunsad ang mga pagbisita, pakighiusa, ug diskusyon kauban ang lain-laing sektor. Aduna usay mga workshop, medical mission, ug paghatag og materyal nga suporta sa mga mag-uuma.

Gawas niini, usa ka rali ang gipangunahan sa Amihan niadtong Oktubre 15 aron handumon ang Kalibutanong Adlaw sa Kababayen-ang Mag-uuma. Niadtong Oktubre 16, subling nagmartsa ang mga grupo sa Quezon City sa pagpanguna sa mga mag-uuma gikan sa isla sa Negros alang sa Kalibutanong Adlaw sa Kagutom. Pagka-ugma, nagprotesta sila sa hedkwarters sa Armed Forces of the Philippines sa Quezon City aron kundenahon ang militarisasyon sa kabanikahan. Usa ka gabii sa pagpasundayag ang gilusad nila kauban ang mga grupo sa artista niadtong Oktubre 19 sa UP Diliman. Nagprotesta usab sila sa Department of Social Welfare and Development niadtong Oktubre 20 aron ipadayon ang pagpangayo og kumpensasyon alang sa mga danyos tungod sa katalagman.

Natapos ang protesta sa mga mag-uuma sa Oktubre 21, anibersaryo sa pekeng reporma sa yuta sa Presidential Decree No. 27 ni Marcos Sr. Nagprotesta sila kauban ang ubang sektor sa Liwasang Bonifacio batok sa korapsyon sa rehimeng Marcos ug sa mga Duterte. Gipanawagan nila ang pagpahawa sa gahum sa duha ka nag-unang kurakot.