Gihasi ug gihadlok sa mga elemento sa Armed Forces of the Philippines ang mga delegado sa International Solidary Mission (ISM) nga naglunsad og imbestigasyon ug pagtuon gikan Oktubre 11 hangtud 14. Anaa sa Pilipinas ang delegasyon aron mahibal-an ang nasinating krisis sa klima, pagkawkaw sa kinaiyahan, ug militarisasyon sa komunidad sa mga mag-uuma ug lumad sa Rizal, ug sa mga isla sa Mindoro, Samar, Leyte ug Negros.

Dayag nga gitiktikan ug gi-piktyuran sa mga sundalo ang mga binyu sa aktibidad sa ISM. Gikuha nila ang mga ngalan sa mga delegado, gisundan sa mga armado ug gisubaybayan hangtud sa ilang gipuy-an. Pila ka beses usab silang nagpalupad og drone ibabaw sa mga tulda diin gihimo ang mga imbestigasyon.

Niadtong Oktubre 14, napugos ang mga delegado nga tapuson ang ilang aktibidad sa Mindoro tungod sa pag-abot sa daghang mga pulis ug sundalo nga nagdala og tag-as nga mga pusil sa kampuhan. Nagresulta kini og dakung kahadlok sa mga lumad ug delegado. Sa Rizal, dayag silang gipugngan nga maglunsad og aktibidad tungod kay wala silay “permit.” Sa paghawa sa mga delegado, padayon nga gitugaw sa mga sundalo ang mga Mangyan sa Mindoro ug Dumagat sa Rizal.

Sumala sa taho sa mga Dumagat sa Tanay, Rizal, sige ang presensya sa militar sa komunidad ug gisugdan ang pagpatawag sa mga residente alang sa interogasyon human sa ISM. Sa Abra de Ilog, Occidental Mindoro, nagpadayon ang pagpamig-ot sa mga sundalo sa komunidad nga nakaapekto sa panginabuhi sa mga residente ug nagdala og kagutom sa mga mag-uuma.

Dungan sa pagpanghasi sa ISM, walay hunong usab ang pag-abuso sa militar sa ubang bahin sa nasud.

Pasistang pagpangatakke sa Negros. Walay puas ang kadaut ug pasistang atake sa mga sundalo sa isla sa miaging mga bulan. Narekord ang daghang mga kaso sa paglapas sa tawhanong katungod atol sa mga operasyong kombat niini sa daghang barangay.

Labing bag-o dinhi mao ang pagpamusil sa 79th IB nga miresulta sa pagkaangol sa mag-uumang si Kato Rizal ug iyang menor de edad nga pag-umangkon samtang nanguha og dugos sa Sitio Nabaisan, Barangay Minapasok, Calatrava, Negros Occidental sa buntag sa Oktubre 17. Sa katapusang report, wala pa nasuta ang nahimutangan sa menor de edad.

Niadtong Oktubre 7, gipang-ransak sa 94th IB ang balay sa usa ka mag-uuma sa Sitio Manluki sa Barangay Carabalan. Usa pud ka mag-uuma ang gidakup sa 94th IB sa Barangay Buenavista ug pugos nga gipagiya sa operasyong kombat. Sa Toboso, pugos nga gisulod ug giransak sa 79th IB ang mga balay sa duha ka mag-uuma niadtong Oktubre 11. Sa Negros Oriental, nataho ang pagpangutingkay ug pagkampo sa 62th IB sa mga sentro sa komunidad, simbahan ug eskwelahan.

Paglapas sa IHL. Ginapaantus ug ginapig-ot sa 703rd IBde ang pamilya ug mga grupo sa tawhanong katungod sa pagbawi sa patayng lawas sa usa ka giingong Pulang manggugubat nga napatay sa engkwentro sa militar ug BHB sa Norzagaray, Bulacan niadtong Oktubre 17. Gikundena sa mga grupo sa tawhanong katungod ang pagdumili sa militar sa paghatag sa patayng lawas sa pamilya ug militarisasyon sa punerarya nga nahilunaan niini. Nagkayamukat usab ang mga pasumbingay sa militar bahin sa nahitabong panagsangka ug paghatud sa patayng lawas.

Sa North Caloocan, migrabe ang militarisasyon sa NTF-Elcac ug sa 12th Civil Military Operation sa mga barangay sugod Oktubre 6. Giokupa sa militar ang Barangay 175, 181-182 Pangarap Village ug Barangay 187-188. Gilunsad niini ang kampanya sa Red-tagging ug pagpamig-ot sa mga myembro sa progresibong grupo.

Pagpatay. Brutal nga gipatay sa kalalaken-an nga sakay sa motorsiklo si Niruh Kyle Antatico niadtong Oktubre 10 sa Barangay Patag, Cagayan de Oro City. Si Antatico usa ka kanhing senior legal researcher sa National Irrigation Administration Region 10 nga giingong nagbutyag sa daghan kaayong korapsyon ug anomalya sulod sa ahensya lakip na ang nangawalang pondo, mga substandard nga proyekto, ug mga pekeng kontrata. Nangayo og hustisya ang Nafeda-Courage alang kang Antatico.