Sukad Setyembre, unum ka sakyanang pangdagat gikan kuno sa Venezuela ang gipabusikad sa US sa Caribbean Sea sa akusasyon nga nagdala kini og mga “narko-terorista” ug nagkarga og iligal nga droga. Gihimo ang mga pagpabusikad isip kabahin sa lain na usab nga serye sa agresyong militar sa Venezuela nga walay basehan nga giakusahan sa presidente sa US nga si Donald Trump nga misuporta sa mga “narko-terorista.” Mikabat na sa 27 ang ekstra-hudisyal nga gipatay sa US sa mga pag-atake niini.

Dungan sa mga pagpabusikad, gipakusog sa US ang ilang presensya militar sa Caribbean Sea pinaagi sa pagpadala og mga warship, usa ka nuclear-powered nga submarino, ug ubang mga sakyanang iggugubat. Nagpalupad usab kini og mga helikopter, fighter jet, ug mga B-52 bomber sa internasyunal nga airspace duul sa Venezuela.

Gimanduan usab ni Trump ang Central Intelligence Agency nga maglunsad og mga sikretong operasyon sulod sa Venezuela batok sa gubyerno ug katawhan niini. Kini subay sa anunsyo ni Trump nga ipatuman ang dugang pang aksyong militar batok sa Venezuela ug pakanang pag-usab sa rehimen sa soberanong nasud. Naghatag usab og $50 milyong reward si Trump alang sa pag-aresto sa presidente sa Venezuela nga si Nicolas Maduro. Kini dugang sa nagtunhay nga mga sangsyon sa ekonomiya nga dugay nang gipahamtang sa US ug sa mga alyado niini sa nasud.

Kauban sa imperyalismong US sa kampanyang agresyon mao ang mga Toong grupo sulod sa Venezuela. Niadtong unang semana sa Oktubre, gibutyag sa gubyerno ni Maduro ang pagsulay sa maong mga grupo nga maghimo og “false flag” nga operasyon diin magtanum ug magpapusikad kini og bomba sa embassy sa US sa Caracas, ang kapital sa Venezuela, aron painiton pa ang tensyon.

Bisan og sirado ang embassy sukad pa sa pagputol sa diplomatikong relasyon sa Venezuela ug US niadtong 2019, adunay mga trabahante ug pwersa sa seguridad nga nagpabilin sa bilding. Human niining balita, gipahunong ni Trump ang bisan unsang paningkamot sa iyang gubyerno nga magkighinabi ug magkig-alayon sa Venezuela.

Wala nagpatarog ang Venezuela ug gubyerno ni Maduro sa mga pag-atake ug mga hulga ni Trump. Matud ni Maduro, “Dili gayud sila makasulod sa Venezuela” ug andam ang militar ug katawhang Venezuelan nga depensahan ang ilang nasud ug soberanya.

Kalibutanong suporta sa Venezuela

Malukpanong gimakmak sa mga grupo sa tibuok kalibutan ang agresyon sa US ug ni Trump sa Venezuela. Nanawagan ang International League of Peoples’ Struggle (ILPS) nga batukan ang pagsulay nga ilisdan ang gubyerno sa Venezuela ug tanang porma sa hybrid nga pakiggubat nga migrabe ilalum ni Trump.

Walay katapusan ang agresyon sa US sa gubyerno sa Venezuela sukad nga mibarog kini batok sa mga imperyalistang dikta niini. “Walay katapusan ang pagsulay sa US nga palagputon ang demokratikong pinili nga gubyerno sa Venezuela, determinadong sigupon ang kita gikan sa lana sa nasud aron patagbawon ang mga monopolyo kapitalista ug mga negosyante,” sumala sa ILPS.

Sa pamahayag sa grupo, ang agresyon sa US nagtumod lang sa pagsuporta sa daghang katawhan sa kalibutan sa Venezuela ug sa ilang makatarunganong pakigbisog alang sa nasudnong soberanya batok sa imperyalistang US.

Sa Pilipinas, gipangunahan sa Philippine-Bolivarian Venezuela Friendship Association ug Bagong Alyansang Makabayan ang pagsuporta sa gubyerno ug katawhan sa Venezuela. Hugot silang nakiglambigit kang Chargé d’Affaires Richard Espinoza Lobo sa Bolivarian Republic of Venezuela Embassy alang sa lain-laing mga aktibidad ug panagtapok.

Lakip na dinhi ang ilang pagkigtigum sa mga representante sa Makabayan Bloc sa House of Representatives niadtong Oktubre 18. Natibuok dinhi ang planong pagsumite sa Makabayan Bloc og usa ka resolusyon sa Kongreso aron makmakon ang militarismo sa US ug suportahan ang pakigbisog sa katawhang Pilipino alang sa kalinaw, nasudnong soberanya, ug katungod sa kaugalingong paghukum sa tanan nasud.