Niligalig at tinakot ng mga elemento ng Armed Forces of the Philippines ang mga delegado ng International Solidary Mission (ISM) na naglunsad ng imbestigasyon at pag-aaral mula Oktubre 11 hangang 14. Nasa Pilipinas ang delegasyon para alamin ang nararanasang krisis sa klima, pandarambong sa kalikasan, at militarisayon sa komunidad ng mga magsasaka at katutubo sa Rizal, at sa mga isla ng Mindoro, Samar, Leyte at Negros.

Hayagang tiniktikan at kinuhanan ng litrato ng mga sundalo ang mga pinagdausan ng aktibidad ng ISM. Kinuha nila ang pangalan ng mga delegado, sinundan ng mga armado at minanmanan hanggang sa kanilang tinutuluyan. Ilang beses ding nagpalipad ng drone sa ibabaw ng mga kampuhan kung saan isinagawa ang mga imbestigasyon.

Noong Oktubre 14, napilitan ang mga delegado na tapusin nang mas maaga ang aktibidad nito sa Mindoro dahil sa pagdating ng puu-puong pulis at sundalo na may bitbit na mahahabang baril sa kampuhan. Nagdulot ito ng matinding takot sa mga katutubo at delegado. Sa Rizal, tahasan silang pinagbawalang magsagawa ng aktibidad dahil wala silang “permit.” Pag-alis ng mga bumisitang delegasyon, tuluy-tuloy na niligalig ng mga sundalo ang katutubong Mangyan sa Mindoro at Dumagat sa Rizal.

Ayon sa ulat ng mga katutubong Dumagat sa Tanay, Rizal dumalas ang presensya ng militar sa komunidad at nagsimulang magpatawag ng mga residente para sa interogasyon matapos ang ISM. Sa Abra de Ilog, Occidental Mindoro, nagpapatuloy ang panggigipit ng mga sundalo sa komunidad na nakakaapekto sa paghahanapbuhay ng mga residente at nagdudulot ng gutom sa mga magsasaka.

Kasabay ng panggigipit sa ISM, walang awat rin ang pang-aabuso ng militar sa iba pang bahagi ng bansa.

Pasistang paninibasib sa Negros. Walang tigil ang pananalasa at pasistang paninibasib ng mga sundalo sa isla sa nagdaang buwan. Naitala ang patung-patong na mga kaso ng paglabag sa karapatang-tao sa kasagsagan ng mga operasyong kombat nito sa maraming barangay.

Pinakahuli sa mga ito ang pamamaril ng 79th IB na nagdulot ng pagkasugat sa magsasakang si Kato Rizal at kanyang menor-de-edad na pamangkin habang kumukuha ng pulot sa Sitio Nabaisan, Barangay Minapasok, Calatrava, Negros Occidental noong umaga ng Oktubre 17. Sa huling ulat ay hindi pa natutunton ang kinaroroonan ng menor-de-edad.

Noong Oktubre 7, niransak ng 94th IB ang bahay ng isang magsasaka sa Sityo Manluki sa Barangay Carabalan. Isang magsasaka rin ang dinukot ng 94th IB sa Barangay Buenavista at sapilitan siyang pinaggiya sa operasyong kombat. Sa Toboso, sapilitang pinasok at niransak ng 79th IB ang bahay ng dalawang magsasaka noong Oktubre 11. Sa Negros Oriental, naulat naman ang panghahalihaw at pagkakampo ng 62nd IB sa mga sentro ng komunidad, simbahan at eskwelahan.

Paglabag sa IHL. Pinahihirapan at ginigipit ng 703rd IBde ang pamilya at mga grupo sa karapatang-tao sa pagbawi sa bangkay ng isang sinasabing Pulang mandirigma na napaslang sa labanan ng militar at BHB sa Norzagaray, Bulacan noong Oktubre 17. Kinundena ng mga grupo sa karapatang-tao ang pagtanggi ng militar na ibigay sa pamilya ang bangkay at militarisasyon sa puneraryang nilalagakan nito. Iba-iba rin ang kwento ng militar hinggil sa nangyaring labanan at paghatid sa bangkay.

Sa North Caloocan, tumindi ang militarisasyon ng NTF-Elcac at ng 12th Civil Military Operation sa mga barangay simula noong Oktubre 6. Sinakop ng militar ang Barangay 175, 181-182 Pangarap Village at Barangay 187-188. Inilulunsad nito ang kampanya ng Red-tagging at panggigipit sa mga myembro ng progresibong grupo.

Pagpatay. Brutal na pinatay ng kalalakihang sakay sa motorsiklo si Niruh Kyle Antatico noong Oktubre 10 sa Barangay Patag, Cagayan de Oro City. Si Antatico ay isang dating senior legal researcher sa National Irrigation Administration Region 10 na sinasabing nagsiwalat ng napakaraming katiwalian at anomalya sa loob ng ahensya kabilang ang nawawalang pondo, substandard na proyekto, at mga pekeng kontrata. Nanawagan ng hustisya ang Nafeda-Courage para kay Antatico.