Demolisyon sa Marikina, gisuklan. Gitukod pag-usab sa mga residente sa Agora Compound sa Barangay Sto. Niño, Dakbayan sa Marikina ang ilang kampuhan niadtong Marso 14 aron pugngan ang demolisyon sa ilang komunidad. Subli nilang gipanawagan ang in-city relocation. Dili moubos sa 145 ka pamilya ang palayason sa demolisyon.

Pagsukol sa pribatisasyon sa palengke sa Cebu, mikaylap. Sunod-sunod nga protesta ang gilunsad sa mga grupo, tindera ug residente sa Carbon Market, Barangay Ermita sa Dakbayan sa Cebu niadtong Marso 14-17 aron ipabasura ang pribatisasyon sa palengke. Gibanabana nga 16,000 ka tindera ug trabahador ang mawad-an og pwesto ug trabaho sa merkado, ug maapil ang 700 ka balay sa silingang Sityo Bato sa pribatisasyon.

Rekrutment sa AFP sa Ateneo, napugngan. Gipaatras sa mga estudyante sa Ateneo de Manila University ang partisipasyon sa Armed Forces of the Philippines (AFP) sa Ateneo Career Fair niadtong Marso 13 tungod sa pagsupak nila dinhi ug sa rekord sa AFP sa paglapas sa tawhanong katungod. Sa adlaw sa career fair, nagrali ang mga estudyante ug gilangkat ang karatula nga “AFP Recruitment Booth.”

Dihadihang pagpauli sa mga migrante, gipanawagan. Nagprotesta ang mga grupo sa Migrante sa Mendiola sa Maynila niadtong Marso 17 aron ipanawagan ang luwas nga pagpauli sa mga migranteng Pilipino nga naipit sa gera sa Middle East. Kauban niini ang pagdumdum sa ika-31 nga anibersaryo sa pagbitay kang Flor Contemplacion niadtong 1995.

.