Gipatuman sa Bagong Hukbong Bayan (BHB)-South Central Negros (Romeo Nanta Command) ang sangsyon sa demokratikong gobyernong bayan batok sa W.D Anglo Agri Farm, usa ka abusadong kumpanya sa agrikultura sa Negros Occidental niadtong Marso 8. Kini panag-iya ni Wilfred D. Anglo ug nahimutang sa Hacienda Baling, Barangay Libacao, Dakbayan sa Himamaylan. Giparalisa ug gisunog sa BHB ang tulo ka traktora, usa ka crane ug usa ka backhoe sa kumpanya nga gibanabana nga nagkantidad og ₱30-₱40 milyon.

Ang mga mamumuo sa kumpanya anaa sa ilalum sa sistema sa pakyaw. Mokabat lang og ₱2,400 kada ektarya ang bayad sa paghilamon (weeding), ₱930 kada laksa (tumbas sa 10,000 ka punoan sa tubo) ang patdan o pagtanom, ₱220 kada tonelada sa pagtapas, ug ₱3 sa kamada (stacking). Hilabihan kini kaubos kumpara sa minimum nga adlawang sweldo sa Negros Occidental (₱520) ug Negros Oriental (₱500) alang sa mga mamumuo sa agrikultura, nga kinapungkayan sa pyudal nga kaalaotan nga dugang naglubong sa mga mag-uuma sa kinabuhi sa sistemikong kagutom.

Gilubong usab ni Anglo sa patong-patong nga utang ang mga mag-uuma pinaagi sa pagpahamtang og 10% nga sinemanang interes sa kwarta nga ilang giutang.